12:26, 25 - اقپان 2022 | GMT +5
سبەربانك قازاقستان مالىمدەمەسى: شوتتاردان اقشا شەشىپ الۋ شەكتەۋسىز قولجەتىمدى
نۇر-سۇلتان. قازاقپارات - سبەربانك قازاقستان جانە ونىڭ بارلىق جۇيەسى قالىپتى تارتىپپەن جۇمىس ىستەيدى، جەكە جانە زاڭدى تۇلعالارعا قاراجاتتار مەن سەرۆيستەر تولىق كولەمدە قولجەتىمدى، دەپ حابارلايدى قازاقپارات اتالعان بانكتىڭ باسپا ءسوز قىزمەتىنە سىلتەمە جاساپ.
«تەڭگەدەگى جانە شەتەل ۆاليۋتاسىنداعى شوتتاردان اقشا شەشىپ الۋ جانە ولاردى تولىقتىرۋ وفيستەردە، بانكوماتتاردا، Sber KZ موبيلدى قوسىمشاسىندا جانە سبەربيزنەستە، سونداي-اق باسقا دا قىزمەت كورسەتۋ كانالدارىندا شەكتەۋسىز قولجەتىمدى. بارلىق تولەم جۇيەلەرىنىڭ پلاستيكالىق كارتالارى بويىنشا تاۋارلار جانە قىزمەت اقىسىن تولەۋ، اقشا اۋدارىمدارى جانە وپەراتسيالار جۇرگىزىلىپ جاتىر جانە تولىق كولەمدە قولجەتىمدى بولادى. ۆاليۋتا ايىرباستاۋ شەكتەۋسىز جۇرگىزىلەدى» دەلىنگەن حابارلامادا.
قابىلدانعان شەكتەۋلەر كليەنتتەردىڭ قاراجاتتارىنىڭ ساقتالۋىنا جانە قولجەتىمدىلىگىنە اسەر ەتپەيدى. سبەربانكتىڭ ورىن العان جاعدايدا قالىپتى جۇمىس ىستەۋ ءۇشىن بارلىق قاجەتتى رەسۋرستارى مەن تاجىريبەسى بار.
