لۋكاشەنكو «ۋكرايناعا اسكەر كىرگىزگەن رەسەيدى قولدادى» دەگەن اقپاراتقا پىكىر ءبىلدىردى

نۇر-سۇلتان. قازاقپارات - الەكساندر لۋكاشەنكو «بەلارۋس ۋكراينا اۋماعىنا باسىپ كىرگەن رەسەي اسكەرىن قولداپ وتىر» دەگەن اقپاراتتى جوققا شىعاردى.

«ناعىز وڭباعاندار! ءبىزدىڭ اسكەرلەر بۇل وپەراتسياعا مۇلدە قاتىسىپ جاتقان جوق»، - دەدى لۋكاشەنكو اسكەريلەرمەن وتكەن جەدەل كەڭەستە.

ول پۋتينگە بەلارۋستىڭ وڭتۇستىگىندە رەسەي قارۋلى كۇشتەرىنىڭ ءبىرشاما بولىگىن قالدىرۋدى ءوزى ۇسىنعانىن جەتكىزدى.

«جانساق اقپارات بولماس ءۇشىن تۇسىندىرە كەتەيىن: ماسكەۋدە وتكەن سوڭعى كەزدەسۋدە پۋتينگە رەسەي فەدەراتسياسى قارۋلى كۇشتەرىنىڭ ءبىرشاما بولىگىن ءوزىمىزدىڭ بەلارۋستىڭ وڭتۇستىگىندە قالدىرۋدى ءوزىم جەكە ۇسىندىم. نەگە؟ مەن بۇل تۋرالى ايتۋعا قىمسىنبايمىن. ءبىز بۇل جاعدايدا وڭتۇستىك باعىتتى قورعاۋعا دايىن ەمەس ەدىك. سەبەبى ۋكراينالىق شەكارالىق ەمەس، اسكەري بولىمشەلەر شەكاراعا قاراي جىلجىپ، وندا مانيەۆرلەر جاساي باستادى»، - دەدى لۋكاشەنكو.

بەلارۋس ەلىنىڭ باسشىسى پۋتين ۋكراينانى باسىپ الۋعا نيەتتى ەمەس ەكەنىن مالىمدەدى.

«بۇل «ساۋ باسقا ساقينا» كىمگە، نە ءۇشىن كەرەك؟ ەشكىم دە وندا ءوزىنىڭ بيلىگىن ورناتۋدى كوزدەپ وتىرعان جوق. بۇل كەلىسسوزدەر جۇرگىزۋدىڭ نەگىزى. وسىنى نەگىزگە الا وتىرىپ، ناقتى ماسەلەنى انىقتاپ، شەشىمدەر شىعارايىق»، - دەدى ول.

ودان بولەك، لۋكاشەنكو د ح ر مەن ل ح ر- دىڭ تاۋەلسىزدىگىن مويىنداۋ ماسەلەسىن بەلارۋس ۇكىمەتى قاراستىرىپ جاتقان جوق ەكەنىن ايتتى.

بۇل جاعدايعا قاتىستى ول «وزىمىزگە جانە رەسەيگە قاجەتتى» شەشىمدى شىعاراتىنىن مالىمدەدى. سونداي-اق، مينسكىدە رەسەي مەن ۋكراينا اراسىندا كەلىسسوزدەر ۇيىمداستىرۋدى ۇسىندى.

بەلارۋس پرەزيدەنتىنىڭ پىكىرىنشە، پۋتيننىڭ بۇل وپەراتسياسى د ح ر مەن ل ح ر- دەگى گەنوتسيدتى توقتاتۋعا جاساعان ارەكەتى. سونىمەن بىرگە، لۋكاشەنكو مينسك پەن ماسكەۋدىڭ مۇددەسىن قورعاۋ قاجەت بولعان جاعدايدا دونباسسقا بەلارۋس اسكەرىن كىرگىزۋگە ۋادە ەتتى.

ەسكە سالساق، بۇعان دەيىن CNN تىلشىلەرى بەلارۋس تاراپى جاقتان اسكەري تەحنيكا ۋكراينالىق شەكارادان باسىپ كىرگەنىن حابارلاعان بولاتىن.

nur.kz