زەلەنسكي كەڭسەسى رەسەي كەلىسسوزدەردەن باس تارتقانىن حابارلادى

نۇر-سۇلتان. قازاقپارات - بۇگىن، ۋكراينا پرەزيدەنتىنىڭ كەڭسەسى رەسەي تاراپىنىڭ كەلىسسوزدەردەن باس تارتقانىن حابارلادى، دەپ جازادى ۋنيان اگەنتتىگى.

ۋكراينا كەڭسەسى باسشىسىنىڭ كەڭەسشىسى ميحايل پودولياك رەسەيدىڭ «كەلىسسوزدەر جاسامايتىنىن جانە جاساعىسى دا كەلمەيتىنىن» مالىمدەدى.

«ولار وزدەرى ءۇشىن قاۋىپتى شەشىم قابىلدادى جانە قانداي دا ءبىر جاۋاپكەرشىلىكتى سەزىنىپ، كەلىسسوزدەرگە كەلگەنشە، بۇل شەشىمدى شۇعىل ورىنداۋعا تىرىسادى»، - دەگەن پودولياكتىڭ سوزدەرىن شەتەل باسىلىمى كەلتىردى.

سونىمەن قاتار، دەرەككوزدە رەسەي وسى ۋاقىت ىشىندە «بارىنشا زيان كەلتىرىپ، ءوز ماقساتىنا جەتۋگە تىرىسادى» دەلىنگەن.

ەسكە سالساق، 22- اقپاندا رەسەي فەدەراتسياسىنىڭ پرەزيدەنتى ۆلاديمير پۋتين دونەتسك حالىق رەسپۋبليكاسى مەن لۋگانسك حالىق رەسپۋبليكاسىنىڭ تاۋەلسىزدىگىن مويىنداۋ تۋرالى جارلىققا قول قويعان بولاتىن. رەسەيدىڭ بۇل شەشىمى الەم ەلدەرىنىڭ نارازىلىعىن تۋدىرىپ، ءبىرقاتار مەملەكەتتەر بۇل جايتقا اشىق تۇردە قارسى شىقتى. بۇل ارەكەتتى ۋكراينا پرەزيدەنتى ۆلاديمير زەلەنسكي «ۋكراينانىڭ اۋماقتىق تۇتاستىعىن بۇزۋ» دەپ اتادى.

23- اقپاندا ەۋرووداق دونەتسك جانە لۋگانسك حالىق رەسپۋبليكالارىن مويىنداعان رەسەيگە قارسى سانكتسيالار جاريالادى. اراعا ەكى كۇن سالىپ، 24- اقپاندا ۆلاديمير پۋتين رەسەيلىكتەرگە ۇندەۋ جاساپ، دونباسستا ارنايى اسكەري وپەراتسيا جۇرگىزۋ تۋرالى شەشىم قابىلدانعانىن مالىمدەدى.

پۋتين ءوز سوزىندە ۋكراينانى وككۋپاتسيالاۋ رەسەيدىڭ جوسپارىندا جوق ەكەنىن، تەك ونى قارۋسىزداندىرۋدى كوزدەيتىنىن اتاپ وتكەن.

بۇل رەتتە، ءتۇرلى ب ا ق وكىلدەرى، ونىڭ ىشىندە جەرگىلىكتى جانە باتىستىڭ تىلشىلەرى ۋكراينانىڭ كيەۆ، كراماتورسك، ودەسسا، حاركوۆ پەن بەرديانسك سەكىلدى قالالارىنان جارىلىس داۋىسىن ەستىگەنىن حابارلادى.

بۇل جارىلىستاردىڭ ۆيدەولارى الەۋمەتتىك جەلىلەردە دە كەڭىنەن تارالىپ كەتتى.

رەسەي پرەزيدەنتىنىڭ مالىمدەمەسى الەم ەلدەرىن بەي-جاي قالدىرمادى. دونباسستاعى ارنايى اسكەري وپەراتسيا تۋرالى اقپاراتتان كەيىن ا ق ش پرەزيدەنتى دجو بايدەن مالىمدەمە جاساپ، بۇل ارەكەتتى «اقتاۋعا كەلمەيتىنىن» جەتكىزدى.

«بۇكىل الەم بۇگىن تۇندە رەسەي قارۋلى كۇشتەرىنىڭ سەبەپسىز جانە اقتاۋعا كەلمەيتىن شابۋىلىنا ۇشىراعان ۋكراينا حالقىمەن بىرگە. پرەزيدەنت پۋتين ادامدار جاپا شەگىپ، قايعى-قاسىرەت اكەلەتىن الدىن الا ويلاستىرىلعان سوعىستى تاڭدادى»، - دەدى ا ق ش پرەزيدەنتى.

وسىدان كەيىن ۋكراينا پرەزيدەنتى شۇعىل بريفينگتە ۋكراينا رەسەيمەن بارلىق بايلانىستى ۇزگەنىن مالىمدەپ، پرەزيدەنت كەڭسەسى باسشىسىنىڭ كەڭەسشىسى ميحايل پودولياك «ەۋروپادا تولىققاندى اۋقىمدى سوعىس» باستالعانىن اشىق ايتقان.

ال ۋكراينا پرەزيدەنتى كەڭسەسى باسشىسىنىڭ ورىنباسارى الەكسەي ارەستوۆيچ 24- اقپانداعى بريفينگتە رەسەي اسكەرلەرى قىرىم مويناعىنان وتكەنىن، حاركوۆ ماڭىندا شايقاستار ءجۇرىپ جاتقانىن جانە ۋكراينانىڭ 40 تان استام ساربازى قايتىس بولعانىن ايتتى.

ودان بولەك، ول رەسەيلىك تاراپتىڭ 4 تانكىسى توقتاتىلىپ، 6 ۇشاعى اتىلعانىن حابارلادى.

«كيەۆ بەرىك قورعالعان، ولاردى قاتتى شايقاستار كۇتىپ تۇر»، - دەدى ول.

سونىمەن بىرگە، رەسەي پرەزيدەنتىنىڭ باسپا ءسوز حاتشىسى دميتري پەسكوۆ رەسەي ۋكراينانى باسىپ الۋ تۋرالى ماقسات قويماعانىن ايتتى.

تاعى ءبىر ايتا كەتەرلىك جايت، س ءى م وكىلدەرى بەرگەن اقپاراتقا ساي، بۇگىندە ۋكراينادا 517 قازاقستاندىق ۋاقىتشا كونسۋلدىق تىركەۋدە تۇر. ولاردىڭ قاتارىندا ەلشىلىك قىزمەتكەرلەرى مەن ولاردىڭ وتباسى مۇشەلەرى، سونىمەن بىرگە ستۋدەنتتەر مەن بيزنەس وكىلدەرى بار.

تۇراقتى كونسۋلدىق تىركەۋىندە تاعى 1113 قازاقستاندىق تۇرعانى حابارلاندى. سونداي-اق، س ءى م قازاقستان ەلشىلىگى ۋكرايناداعى ازاماتتاردى ەۆاكۋاتسيالاۋدى قامتاماسىز ەتىپ جاتقانىن ءمالىم ەتتى.

ال ەلىمىزدىڭ ازاماتتىق اۆياتسيا كوميتەتى Telegram كانالىندا ۋكرايناعا اۋە رەيستەرىنىڭ توقتاتىلۋىنا بايلانىستى جەدەل جەلى قىزمەتى ىسكە قوسىلعانىن جەتكىزدى.

وعان قوسا، بۇگىن رەسەي پرەمەر-ءمينيسترى ميحايل ميشۋستين نۇر-سۇلتانعا ۇشىپ كەلدى. ول 24-25- اقپاندا نۇر-سۇلتاندا وتەتىن ە ە و ۇكىمەتارالىق كەڭەسىنىڭ وتىرىسىنا قاتىسپاق.

وندا رەسەي، ارمەنيا، بەلارۋس، قازاقستان جانە قىرعىزستان ۇكىمەتتەرىنىڭ باسشىلارى ەۋرازيالىق ەكونوميكالىق وداق اياسىنداعى ينتەگراتسيانى تەرەڭدەتۋ ماسەلەسىن تالقىلايدى.