پرەزيدەنت «قازاق تەلەكوم» ا ق باسقارما ءتوراعاسىن قابىلدادى

نۇر-سۇلتان. قازاقپارات - مەملەكەت باسشىسىنا قازاقستاننىڭ تەلەكوممۋنيكاتسيا سالاسىنىڭ قازىرگى احۋالى، ونىڭ موبيلدى سەگمەنتىنىڭ دامۋى، حالىق پەن بيزنەسكە كورسەتىلەتىن قىزمەتتەردىڭ ساپاسىن جاقسارتۋ جانە ونىڭ اياسىن كەڭەيتۋ جونىندەگى جۇمىستار تۋرالى باياندالدى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

قاسىم-جومارت توقايەۆقا 5G جەلىسىن ەنگىزۋدىڭ جانە سيفرلىق تەڭسىزدىكتى ودان ءارى تومەندەتۋدىڭ پەرسپەكتيۆالارى تۋرالى مالىمەت بەرىلدى.

اتاپ ايتقاندا، قۋانىشبەك ەسەكەيەۆ پرەزيدەنتكە 2018-2020-جىلدارى اۋىلدىق جەرلەردە سالىنعان وپتيكالىق-تالشىقتى ماگيسترال بازاسىندا جەرگىلىكتى جەلىلەردى سالۋ بويىنشا جوبالاردى جۇزەگە اسىرۋ تۋرالى ايتتى.

«سيفرلىق سەرىكتەس» باعدارلاماسى اياسىندا جوعارى جىلدامدىقتى ينتەرنەتتى ءاربىر ۇيگە جەتكىزۋ جوباسىنا جەكە سەرۆيستىك كومپانيالار قوسىلعان. سونىمەن قاتار، مەملەكەت باسشىسى كومپانيانىڭ 2300 م گ ت س دياپازونىنداعى FWA (Fixed Wireless Access، تىركەلگەن سىمسىز بايلانىس) وزىق تەحنولوگياسىن پايدالانۋ جونىندەگى جوسپارىمەن تانىستى.

كەزدەسۋ قورىتىندىسى بويىنشا قاسىم-جومارت توقايەۆ كومپانيانىڭ قالا مەن اۋىل اراسىنداعى سيفرلىق تەڭسىزدىكتى تومەندەتۋ جونىندەگى قازىرگى قىزمەتىنە، سونداي-اق ۇلتتىق تەلەكوم- وپەراتوردىڭ پەرسپەكتيۆاسى بار جوبالارىنا قاتىستى ءبىرقاتار ناقتى تاپسىرما بەردى.