بيىلدان باستاپ ۇ ب ت كەزىندە ءار تالاپكەردى بىردەن ەكى كامەرا باقىلاپ وتىرادى

نۇر- سۇلتان. قازاقپارات - بىلتىرعى قاڭتار ايىنداعى ۇ ب ت- مەن سالىستىرعاندا تىيىم سالىنعان زاتتاردى الىپ كىرۋ ارەكەتتەرىنىڭ سانى دا ازايعان، دەپ حابارلايدى قازاقپارات.

ءبىلىم جانە عىلىم مينيسترلىگىنىڭ مالىمەتىنشە، سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەستىلەۋدەن ءوتۋ مۇمكىندىگىنەن 90 تالاپكەر ايىرىلدى. بۇل 2021 -جىلمەن سالىستىرعاندا ءۇش ەسە از.

ەستەرىڭىزگە سالا كەتەيىك، ۇ ب ت ءۇش دەڭگەيلى جۇيە بويىنشا وتكىزىلەدى: Face ID جەكە باسىن سايكەستەندىرۋ ارقىلى، جەكە كۋالىك بويىنشا، سونداي- اق تەستىلەۋ ورنىندا جەكە باسىن سايكەستەندىرۋ جۇرگىزىلەدى. بيىل تەستىلەۋ العاش رەت «ءبىر كومپيۋتەر - ەكى كامەرا - ءبىر تەستىلەۋشى» قاعيداسى بويىنشا وتكىزىلدى. ەگەر بۇرىن تەستىلەۋ بارىسى ءار كومپيۋتەردىڭ ۇستىندە ورنالاسقان ءبىر عانا كامەرادان باقىلانسا، ەندى ۇ ب ت كەزىندە جەكە تۇلعانى سايكەستەندىرۋگە جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن ەكىنشى (الدىڭعى) كامەرا ورناتىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان بارلىعى 229 ادام شىعارىلىپ، ولاردىڭ ناتيجەسى جويىلدى.