بالاڭىز سولاقاي بولسا

نۇر-سۇلتان. قازاقپارات - سولاقايلاردىڭ ارەكەتى مەن ويلاۋى باسقالارعا ەرەكشە بولىپ كورىنەدى.

سەبەبى سولاقايلاردىڭ ميى تاپسىرمانى ورىنداۋ ءۇشىن ەرەكشە ستراتەگيالاردى قولدانادى. بالاڭىز سولاقاي بولسا، ونى جاقسىراق تۇسىنۋگە كومەكتەسەتىن بىرنەشە پايدالى كەڭەس ۇسىنامىز.

ولار جەر شارىنداعى حالىقتىڭ شامامەن %15 ىن عانا قۇرايدى، ال الەمدەگى بارلىق دۇنيەلەردى كوپشىلىك ادامعا، ياعني، وڭقايلارعا بەيىمدەلە جاساعان. سوندىقتان كىشكەنتاي سولاقايعا ءسىزدىڭ قولداۋىڭىز بەن كومەگىڭىز قاجەت. سولاقايدى تاربيەلەۋدىڭ ءوز ەرەكشەلىگى بار. تومەندەگى ۇسىنىستاردى پايدالانۋ ارقىلى كىشكەنتاي سولاقايدىڭ ءومىرىن جەڭىل ءارى قاراپايىم ەتەسىز.

1. قايسىسى وڭ جانە سول قول ەكەنىن ەسىنە ءتۇسىرىڭىز

سولاقاي بالا قاي قولى - وڭ، ال قاي قولى - سول ەكەنىن ناشار تۇسىنەدى. سوندىقتان بالاعا اشىق ءتۇستى بىلەزىك (ساعات) الىپ بەرىڭىز نەمەسە بالاڭىزبەن بىرگە وعان ارنالعان اشەكەي جاساڭىز. سول زاتتى ونىڭ سول قولىنا تاعىپ، بىلەزىك تۇرعان قولدىڭ سول قول ەكەنىن ايتىڭىز. سول كەزدە بالا قاجەت كەزدە وڭ مەن سولعا جىلدام باعىتتالا الادى.

2. بالانىڭ سولاقاي ەكەنىنە اسا ءمان بەرمەڭىز

ەگەر ۇنەمى نازارىڭىزدى بالانىڭ سولاقاي ەكەنىنە اۋدارساڭىز، بالا ءوزىن قۇرداستارىنىڭ اراسىندا «بوتەن» سەزىنەدى. اتا- انا بالاعا بارىنشا بىلدىرتپەي كومەكتەسۋى كەرەك. مىسالى، مۇعالىممەن جەكە سويلەسىپ، كورشىسىنىڭ وڭ قولى كەدەرگى بولماس ءۇشىن ونى پارتانىڭ سول جاعىنا وتىرعىزۋدى ءوتىنۋ.

3. ەكى قولىن دا قولدانۋدى ۇيرەتىڭىز

سولاقاي بالانى كىشكەنتاي كەزىنەن باستاپ ەكى قولىن دا قولدانۋدى ۇيرەتۋگە بولادى. بۇل باسىم ءرولدى اتقاراتىن سول قولىنىڭ ارەكەتىن ازايتۋ كەرەك دەگەن ءسوز ەمەس. جالپى ەكىنشى قولىمەن ءاردايىم كومەكتەسۋ كەرەگىن ءتۇسىندىرىپ ۇيرەتىڭىز.

4. كىشكەنتاي سولاقايدى اسىقتىرماڭىز

سولاقاي بالالار ءجيى باياۋ بولىپ كەلەدى. ونى اسىقتىرۋدىڭ جانە وعان ايقايلاۋدىڭ پايداسى جوق. ودان سولاقاي بالا شاپشاڭ بولىپ كەتپەيدى. ول ونىڭ ورنىنا كۇيگەلەكتەنىپ، دۇرلىگە باستايدى. ناتيجەسىندە، بالا جاساپ وتقان نارسەسىن اياقتاي دا المايدى.

5. ساباعىن قايتالاتىڭىز جانە قورىتىندى جاساتىڭىز

ماماندار سولاقايلارعا العان ءبىلىمىن جۇيەلەندىرۋ كەرەگىن دالەلدەدى. ياعني، ەگەر وڭقاي بالا كەي زاتتاردى جىبەرىپ السا دا، جالپى ساباق تاقىرىبىن تۇسىنە السا، سولاقايلار ءۇشىن ول مۇمكىن ەمەس. ءار جاڭا ماتەريال قايتالاۋ جانە قورىتىندىلاۋ ارقىلى كەزەڭمەن ءسىڭىرىلۋى كەرەك.

6. جۇمىس ۇستەلىن سولاقايعا بەيىمدەپ ۇيىمداستىرىڭىز

جارىق وڭ جاقتان ءتۇسىپ، كىتاپتار وڭ جاقتا تۇرۋى كەرەك.

7. بالانى سىزبا جانە ەرەجە بويىنشا وقىتىڭىز

سولاقاي بالاعا اناليز جاساۋ قيىنعا تۇسەدى. سوندىقتان وقۋ بارىسىندا قاراپايىم ءارى تۇسىنىكتى سىزبالاردى قولدانىڭىز.

8. مەكتەپتە وتكەن ساباعىن ۇيدە قايتالاڭىز

وقۋشى كوپ سىنىپتا ءار بالامەن جەكە دايىندالۋعا ۋاقىت جوق. سوندىقتان اتا- انا بالامەن بىرگە وتكەن ساباقتىڭ ءبىراز بولىگىن ۇيدە قايتادان قايتالاۋعا دايىن بولۋى كەرەك.

9. جازۋعا اسا ءمان بەرىڭىز

سولاقاي بالاعا ءارقاشان جازۋ قيىنعا سوعادى. سولاقاي وقۋشى جولدى اياقتاماي قويۋى مۇمكىن جانە اينا جازۋمەن جاۋزى مۇمكىن. وقۋ كەزىندە سولاقاي بالا سويلەمنىڭ ورتاسىنان باستاۋى مۇمكىن. سوندىقتان بالانى سولدان- وڭعا قاراي وقۋدى جانە جازۋدى ۇيرەتىپ، سونى ادەتكە اينالدىرۋىن قاداعالاۋ كەرەك.

10. وقۋ كەزىندە بەتبەلگى قولدانىڭىز

وقۋ كەزىندە نەمەسە كىتاپپەن جۇمىس ىستەۋ كەزىندە بەتبەلگى نەمەسە سىزعىش قولدانعان ءجون. سەبەبى سولاقاي بالاعا ماتىندەگى جولداردى باقىلاپ وتىرۋ قيىن، ول جولدارىن شاتاستىرىپ، جوعالتىپ الىپ، باسقا سويلەمگە كوشىپ كەتۋى مۇمكىن.

سولاقايلاردىڭ ەرەكشەلىگى - باسقالاردان وزگەشە ويلاۋى. سوندىقتان سولاقايلاردىڭ كوپشىلىگى دانىشپان نەمەسە شىعارماشىل ادام بولىپ كەلەدى دەپ سانالادى. مىسالى، ءسىز بەن ءبىز بىلەتىن اتاقتى سولاقايلاردىڭ قاتارىنا يۋلي تسەزار، الەكساندر ماكەدونسكيي، جاننا د׳ارك، ناپولەون، ۋينستون چەرچيلل، ميكەلاندجەلو، لەوناردو دا ۆينچي، رافاەل، مارك تۆەن، چارلي چاپلين، پول ماككارتني جانە رينگو ستارر، مەرلين مونرو، روبەرت دە نيرو، دجيم كەرري، توم كرۋز، انجەلينا دجولي، نيكول كيدمان، سيلۆەستەر ستالونە، بريۋس ۋيلليس، اعىلشىن كوروليەۆاسى ەليزاۆەتا، بەتحوۆەن، گرەتا گاربو، دجوردج بۋش سىندى تانىمال تۇلعالار كىرەدى. سوندىقتان سولاقاي بالاڭىزدى وڭقاي ەتەمىن دەپ قيناماي، كەرىسىنشە، ونىڭ ەرەكشەلىگىن قابىلداپ، وعان سەنىم ارتىڭىز.

massaget.kz