ۋتيلالىم تومەندەگەننەن كەيىن اۆتوموبيل باعاسى تۇسە مە - ساراپشى پىكىرى
«كەز كەلگەن مەملەكەت ىشكى نارىعىن قورعاۋ، وتاندىق ءوندىرىسىن قولداۋ ءۇشىن ءىس- شارالار قابىلدايدى. كادەگە جاراتۋ الىمى قازاقستاندىق اۆتوموبيل زاۋىتتارىنىڭ قالىپتاسۋى بارىسىندا ناقتى رولگە يە بولدى. بۇل جول ونەركاسىپتە، ونىڭ ىشىندە اۆتوموبيل جاساۋعا زور جەتىستىكتەرگە جەتكەن ءبىرقاتار ەلدىڭ تاجىريبەسى نەگىزىندە تاڭداپ الىنعان بولاتىن. باستاپقىدا مەملەكەت سالاعا قاجەتتى جاعداي مەن قولداۋ ءىس- شارالارىن جاساپ، جان- جاقتى كومەكتەسەدى. سودان كەيىن بارىپ اتالعان زاۋىتتار باسەكەلەستىك ورتادا جۇمىس ىستەۋگە قابىلەتتى بولا ءتۇسىپ، مەملەكەت قورعاۋ ءىس- شارالارىن بىرتىندەپ تومەندەتەدى.
ۋتيلالىمدى 2 ەسەگە تومەندەتۋ كاسىپورىندارىمىزدىڭ جۇمىسىنا اسەر ەتەتىندىگى ءسوزسىز. ەڭ الدىمەن نارىقتاعى باسەكەلەستىك كۇشەيەدى. بۇعان قوسا، وتاندىق اۆتوزاۋىتتار جيناقتاپ ۇلگەرگەن ءوندىرىس قارقىنىڭ ايتارلىقتاي جوعارى بولۋى دا كوڭىلگە دەمەۋ. وزدەرىڭىز- اق تورەلىگىن ايتارسىزدار، وسىدان 3 جىل بۇرىن ۇكىمەت 5 جىلدىڭ ىشىندە بارلىق ۇلگىدەگى 100 مىڭ اۆتوموبيل قۇراستىرۋ مىندەتىن جۇكتەگەن ەدى. ال، وتاندىق اۆتوونەركاسىپ 2021 -جىلدى 92 مىڭ كولىك قۇراستىرۋمەن اياقتادى. دەمەك، مەجەلى تسيفرعا از عانا قالدى. مۇنىڭ ءوزى كارانتيندەگى 2 جىلعا قاراماستان قول جەتكىزىلگەن جەتىستىك. باسقاشا ايتار بولساق، مەملەكەتتىك قولداۋ ءىس- شارالارى تيىمدىلىگىن بەرىپ وتىر»، - دەدى ول.
وسى رەتتە قىدىروللا جۇماعۇلوۆ «سەماز» زاۋىتىن مىسالعا كەلتىردى.
«مۇمكىنشىلىكتەردىڭ اشىلعانىنان كورگەننەن كەيىن كاسىپورىن باسشىلىعى ءوندىرىستى كەڭەيتۋ تۋرالى شەشىم قابىلدادى. وسى ماقاساتتا قوسىمشا ءوندىرىس الاڭى ساتىپ الىندى. قولدانىستاعى 17 مىڭ شارشى مەترگە قوسىمشا تاعى 30 مىڭ شارشى مەتر الدىق. بۇل الاڭدا لوكاليزاتسيانى تەرەڭدەتۋگە مۇمكىندىك بەرەتىن زاماناۋي قۇرال- جابدىقتاردى ورناتۋ جوسپارلانعان. قازاقستان ۇكىمەتى اتىنان يندۋستريا جانە ءينفراقۇرىلىمدىق دامۋ مينيسترلىگى جىلدا بىزگە قازاقستاندىق قامتۋدى تەرەڭدەتۋگە قاتىستى بارىنشا جوعارى تالاپ قويىپ كەلەدى. وسى ماقساتتا زاۋىت مينيسترلىكپەن ونەركاسىپتىك قۇراستىرۋ تۋرالى كەلىسىم جاساپ، وندا اتالعان شارتتىڭ ءبارى بەكىتىلگەن. ءبىز ءۇشىن لوكاليزاتسيا تەك قانا قاجەتتىلىك ەمەس، سونىمەن بىرگە تيىمدىلىك ەكەندىگىن بىرنەشە مارتە مالىمدەدىك. بۇل ەڭ الدىمەن ءونىمىمىزدىڭ وزىندىك قۇنىن تومەندەتەدى»، - دەدى زاۋىت ديرەكتورىنىڭ ورىنباسارى.
سونىمەن قاتار ول كادر ماسەلەسىنە دە جەكە توقتالىپ ءوتتى.
«قازىرگى ءوندىرىستىڭ تالابىنا وراي جىل سايىن وڭىرىمىزدەگى وقۋ ورىندارىنا تالاپتى كۇشەيتىپ كەلەمىز. زاۋىتقا بىلىكتىلىگى جوعارى جۇمىسشىلاردىڭ كەلۋى وتە ماڭىزدى. سالامىزدى دامىتۋ مۋلتيپليكاتيۆتى اسەر بەرەدى. زاۋىتتارىمىزدى كەزەڭ- كەزەڭمەن دامىتۋدىڭ ارقاسىندا ارالاس وزگە دە سالالار دامي تۇسەدى. ال بۇل جاڭا جۇمىس ورنى، بيۋدجەتكە سالىق دەگەن ءسوز»، - دەدى ول.
زاۋىت ديرەكتورىنىڭ ورىنباسارى كادەگە جاراتۋ الىمى تومەندەگەننەن كەيىنگى كولىك باعاسىنا قاتىستى ويىمەن دە ءبولىستى.
«ۋتيلالىم تومەندەگەننەن كەيىن اۆتوموبيل باعاسى تۇسە مە؟» دەپ ءجيى سۇرايدى. مەنىڭشە، باعا ءسال عانا تومەن ءتۇسۋى مۇمكىن. ويتكەنى، باعانىڭ قالىپتاسۋىنا ءتۇرلى فاكتور اسەر ەتەدى جانە ۋتيلالىم مولشەرى بۇل رەتتە نەگىزگى ەمەس. ءبىز ءونىمىمىزدىڭ قۇنىنا كادەگە جاراتۋ الىمى قوسىلمايتىندىعىن ايتىپ كەلەمىز. ءاۆتووندىرىستى ىنتالاندىرۋ باعدارلاماسى ۋتيلالىمدى وتەۋگە مۇمكىندىك بەردى. ال يمپورت ارقىلى ەلىمىزگە كەلەتىن اۆتوموبيلدەر ءسال ارزاندايتىن شىعار. قانشاعا؟ بۇل يمپورتاۋشىلارعا قويىلاتىن ساۋال»، - دەدى قىدىروللا جۇماعۇلوۆ.
