پەنتاگون: رەسەي اسكەرى ساقاداي ساي تۇر

نۇر-سۇلتان.قازاقپارات - رەسەي اسكەرى ل ح ر مەن د ح ر اۋماعىنا كەلىپ، اسكەري ءىس- قيمىلعا ساقاداي ساي تۇر. بۇل تۋرالى ا ق ش- تىڭ قورعانىس مينيسترلىگى مالىمدەدى.

سونداي- اق پەنتاگون ەۋروپاعا 800 دەي امەريكاندىق ساربازدىڭ جانە ۇشاقتار مەن تىكۇشاقتاردىڭ ورنالاستىرىلعانىن جەتكىزدى.

دجون كيربي، پەنتاگون وكىلى:

- رەسەي اسكەرىنىڭ ۋكراينا شەكاراسىنا وتە جاقىن كەلىپ جاتقانىن كورىپ وتىرمىز. ولار ۋكراينادا اسكەري وپەراتسيا جاساۋعا ساقاداي ساي تۇر. ولار دايىن. ءبىز بۇعان سەنىمدىمىز. «دايىن» دەگەن سوزدەن ارتىق ازىرگە ەشتەڭە ايتپاي- اق قويايىن. قۇرباندىق، قيىن- قىستاۋ زامان بولادى. جاعداي سوعىسقا اپارا جاتقان سياقتى. تۇككە قاجەتى جوق سوعىس.

ال ۋكراينادا توتەنشە جاعداي جاريالاندى. رەسەي باسقىنشىلىعىنا بايلانىستى رەزەرۆتەگى ازاماتتاردى اسكەر قاتارىنا شاقىرۋ جالعاسىپ جاتىر. رەسمي كيەۆ بىرىككەن ۇلتتار ۇيىمىنا كرەملدىڭ وتارلاۋ جوسپارىن توقتاتۋدى سۇراپ، رەسمي حات جولدادى. ال رەسەيدىڭ وكىلى «ۋكراينانىڭ شىعىسىنداعى ورىس ءتىلدى قاۋىمدى گەنوتسيدكە ۇشىراتىپ، قاراپ وتىرا المايمىز» دەپ قارسى ءۋاج ايتقان. ءبىراق بۇل پىكىرمەن ب ۇ ۇ باس حاتشىسى انتونيۋ گۋتەرريش پەن ا ق ش وكىلدەرى كەلىسكەن جوق.

انتونيۋ گۋتەرريش، ب ۇ ۇ باس حاتشىسى:

- ۋكرايناداعى قاقتىعىس ۋشىقسا، الەم كوپتەگەن جىلدار بويى بولماعان زورلىق- زومبىلىققا كۋا بولۋى مۇمكىن. اقىلعا جۇگىنىپ، جاڭجالعا قارسى تۇراتىن كەز كەلدى. بۇل جەردە قاقتىعىستى ودان سايىن ۋشىقتىراتىن ءىس- ارەكەتتەر مەن مالىمدەمەلەرگە جول بەرۋگە بولمايدى. ۋكراينا حالقىن سوعىس ورتىنەن امان الىپ قالۋ ءۇشىن وق اتۋدى توقتاتىپ، ديالوگقا كوشۋىمىز كەرەك.

www.24.kz