ۋتيل الىمىنىڭ تومەندەۋى شەتەلدىك كولىكتەردىڭ باعاسىن ارزانداتادى – ديستريبيۋتەر
«SUBARU KAZAKHSTAN» ج ش س ديرەكتورى اقىلبەك اناربايەۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«شەتەلدە وندىرىلگەن كولىكتەرگە بەلگىلەنگەن ۋتيليزاتسيالىق الىم مولشەرىن 50 پايىزعا دەيىن ازايتۋ جونىندە شەشىم قابىلدانعانىن ەستىدىك. ءبىز مۇنى وڭ تەندەنتسيا دەپ باعالاپ وتىرمىز. سەبەبى ءبىز يمپورتتايتىن Subaru اۆتوكولىكتەرىنە بۇرىنعى مولشەرلەمە بويىنشا ورتا ەسەپپەن 1,5 ميلليون تەڭگە ۋتيليزاتسيالىق الىم تولەيتىن ەدىك. ەندى مولشەرلەمەنى 50 پايىز تومەندەتسە، ونىڭ كولەمى 750 مىڭ تەڭگە بولادى. بۇل ءبىزدىڭ Subaru-دىڭ باعاسى وسى سوماعا ارزاندايدى دەگەن ءسوز.
پرەزيدەنت مىرزا «حالىق ۇنىنە قۇلاق اساتىن مەملەكەت قۇرامىز» دەپ ايتىپ جاتىر عوي. سول قاعيدات بويىنشا حالىق تالابىن ەستىپ، ۋتيل الىم مولشەرىن 50 پايىزعا دەيىن قىسقارتتى. ول وڭ ناتيجە بەرەدى دەگەن ءۇمىتىمىز بار»، - دەدى يمپورتتاۋشى كومپانيانىڭ باسشىسى سەرىكتەستىك ديرەكتورى ۋتيليزاتسيالىق الىمنىڭ جاڭا مولشەرلەرى رەسمي كۇشىنە ەنگەن كۇننەن باستاپ ءوز كولىكتەرىنىڭ باعاسى ارزاندايتىنىنا سەنىمدى.
«ۋتيليزاتسيالىق الىمنىڭ جاڭا مولشەرلەمەسى قاشان كۇشىنە ەنەتىنىن ازىرگە بىلمەيمىز. رەسمي اقپارات كۇتىپ وتىرمىز. جاڭا مولشەرلەمە كۇشىنە ەنگەننەن كەيىن بارىپ «جاسىل دامۋ» ۇيىمىنا الىم تولەي باستايمىز. سودان كەيىن بارىپ ءبىزدىڭ ماشينالاردىڭ باعاسى تومەندەيدى»، - دەدى اقىلبەك اناربايەۆ.
كەي ساراپشىلار ۋتيليزاتسيالىق الىم ءىشىنارا ازايتىلعانىمەن، كولىك باعاسى ارزاندامايتىنىن ايتىپ ءجۇر. ۋتيليزاتسيالىق الىمنىڭ بۇرىنعى مولشەرلەمەسىنەن ۇنەمدەلگەن قاراجات ديستريبيۋتەردىڭ قالتاسىندا مارجا رەتىندە قالاتىنى ايتىلعان بولاتىن. جاپونيالىق ءوندىرۋشىنىڭ سەرىكتەسى وزدەرىنىڭ مۇندايعا بارمايتىنىن ايتتى.
«وندايعا بارمايمىز. مەن سىزگە سەبەبىن ايتايىن. ءبىزدىڭ باعانى جاپونياداعى زاۋىت تەكسەرىپ وتىرادى. ۇستىنە قوساتىن مارجامىزدى زاۋىتتىڭ ءوزى تىكەلەي باقىلاپ وتىرادى. ياعني، ويىمىزعا كەلگەن مارجانى قويا المايمىز. حالىق سونى ءتۇسىنۋى كەرەك. جاپونياداعى ءوندىرۋشى الەم بويىنشا باعانى قاداعالاپ وتىرادى. مىسالى، قازاقستاندا ءبىر مارجا، رەسەيگە بولەك مارجا بولۋىنا جول بەرمەيدى. مارجانىڭ پايىزى بۇكىل ەلدە بىردەي بولۋى كەرەك»، - دەپ ءتۇسىندىردى «SUBARU KAZAKHSTAN» ج ش س ديرەكتورى.
