16:51, 23 - اقپان 2022 | GMT +6
قىرعىز دەپۋتاتى بالالارىنىڭ قازاقشا سويلەپ كەتكەنىنە كۇيىندى
نۇر- سۇلتان. قازاقپارات – قىرعىز دەپۋتاتى تەلەباعدارلاما سالدارىنان بالالارىنىڭ قازاقشا سويلەپ كەتكەنىن ايتىپ شاعىندى. بۇل تۋرالى Orda.kz حابارلادى.
«قىرعىزستان جوگوركۋ كەنەشىنىڭ دەپۋتاتى نۇرجىگىت قادىربەكوۆ قازاقستاننىڭ «بالاپان» تەلەارناسىن كورىپ جۇرگەن قىزدارىنىڭ قازاقشا سويلەيتىنىنە شاعىمدانعانى تۋرالى اقپارات تارادى»، - دەلىنگەن حابارلامادا.
دەپۋتاتتىڭ ايتۋىنشا، مۇنداي كەلەڭسىزدىككە قىزدارىنىڭ قازاق تىلىندە اقپارات تاراتاتىن «بالاپان» تەلەارناسىن كۇندەلىكتى قارايتىنى سەبەپ بولعان. وسىنىڭ ناتيجەسىندە قىرعىز دەپۋتاتىنىڭ قىزدارى كورشى مەملەكەتتىڭ ءتىلىن جەتىك مەڭگەرىپ ۇلگەرگەن.
«ال ءبىزدىڭ «بالاستان» تەلەارناسىنىڭ جارتى شىعارىلىمى ورىس تىلىندە. بالالارىمىز مەملەكەتتىك ءتىلدى جەتىك ءبىلۋى ءۇشىن بۇل ارنانى تولىق قىرعىز تىلىنە كوشىرۋ كەرەك»، - دەدى ول.
