شەتەلدىك ينۆەستورلار «قازاقستان حالقىنا» جارنانى ەرىكتى تۇردە اۋدارادى - توقايەۆ

نۇر-سۇلتان. قازاقپارات - شەتەلدىك ينۆەستورلار «قازاقستان حالقىنا» جارنانى ەرىكتى تۇردە اۋدارادى.

بۇل تۋرالى بەينەبايلانىس رەجيمىندە وتكەن قازاقستان رەسپۋبليكاسىنىڭ پرەزيدەنتى جانىنداعى شەتەلدىك ينۆەستورلار كەڭەسىنىڭ كەزەكتەن تىس وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

پرەزيدەنت ءوز سوزىندە «قازاقستان حالقىنا» قوعامدىق الەۋمەتتىك قورىنىڭ قۇرىلعانى جونىندە ايتتى.

«كەيبىر شەتەلدىك ينۆەستورلار اراسىندا قورعا جارنا اۋدارۋ مىندەتتى مە دەگەن سۇراق تۋىندايدى. جارنا اۋدارۋ ەرىكتى تۇردە جۇرگىزىلەتىنىن اتاپ وتكىم كەلەدى»، - دەدى مەملەكەت باسشىسى.

قاسىم-جومارت توقايەۆ كەزدەسۋدى قورىتىندىلاي كەلە، ەلىمىزدە جۇزەگە اسىرىلىپ جاتقان رەفورمالارمەن قاتار، كەڭەس تە ءوز قىزمەتىندەگى تاسىلدەردى جاڭارتىپ وتىرۋعا ءتيىس ەكەنىن اتاپ ءوتتى.

«مەن بەلسەندى تۇردە كومەكتەسۋگە، نەگىزدەلگەن شەشىمدەر قابىلداۋعا دايىنمىن. جالپى، مەن قازاقستاندا قولايلى ينۆەستيتسيالىق كليمات قالىپتاستىرۋعا باسىمدىق بەرەمىن. سىزدەردەن تىڭ باستامالار مەن ۇسىنىستار كۇتەمىن. كەڭەس ءوزارا ىقپالداستىقتىڭ، ەكونوميكانى ءارتاراپتاندىرۋدىڭ، ازاماتتاردىڭ ءال-اۋقاتىن ارتتىرۋدىڭ شىنايى ءارى ناقتى تەتىگىنە اينالۋى كەرەك»، - دەدى پرەزيدەنت.

جيىن سوڭىندا مەملەكەت باسشىسى كەڭەستىڭ كەلەسى 34- پلەنارلىق وتىرىسىنىڭ كۇن ءتارتىبىن جاريالادى. الداعى جيىن ەكونوميكانى دەكاربونيزاتسيالاۋ جانە تومەن كومىرتەكتى تەحنولوگيالاردى ەنگىزۋ ماسەلەلەرىنە ارنالادى. سونداي-اق پرەزيدەنت شەتەلدىك ينۆەستورلاردىڭ ەلىمىزدەگى جۇمىستارىنا قاتىستى ءبىرقاتار وزەكتى ساۋالعا جاۋاپ بەردى.

جيىن بارىسىندا ەكونوميكا ءمينيسترى الىبەك قۋانتىروۆ، ازيا دامۋ بانكى، ەۋروپا قايتا قۇرۋ جانە دامۋ بانكى، Citigroup، EY، Exxon Mobil، Chevron، TotalEnergies، Shell، Eni S.p.A.، CNPC، Cameco، ArcelorMittal، General Electric جانە باسقا دا حالىقارالىق ءىرى قارجى جانە بيزنەس قۇرىلىمدارىنىڭ جەتەكشىلەرى ءسوز سويلەدى.

كەزدەسۋدى «شەتەلدىك ينۆەستورلاردىڭ قازاقستاندىق كەڭەسى» اسسوتسياتسياسىنىڭ باسقارما ءتوراعاسى ەرلان دوسىمبەكوۆ جۇرگىزدى.