قازاقستاندا ۇكىمەت قابىلدايتىن شەشىمدەردى عىلىمي تۇرعىدان زەرتتەۋ ۇسىنىلدى

نۇر- سۇلتان. قازاقپارات - ەل تاعدىرىنا قاتىستى ۇكىمەت قابىلدايتىن مەملەكەتتىك ماڭىزدى شەشىمدەردى عىلىمي تۇرعىدان زەرتتەۋ ۇسىنىلدى.

ودان بولەك، زاڭ قابىلداۋ كەرەكتىگى دە ايتىلدى. اتالعان باستامانى مەملەكەتتىك قىزمەت سالاسىنداعى وڭىرلىك حاب باسقارۋشى كوميتەتىنىڭ ءتوراعاسى ءاليحان بايمەنوۆ كوتەردى، دەپ حابارلايدى قازاقپارات ءتىلشىسى.

«قاڭتار وقيعاسى مەملەكەتتىك باسقارۋ جۇيەسىن قايتا قاراپ، جەتىلدىرۋ كەرەكتىگىن كورسەتتى. بۇل رەتتە مەملەكەتتىك باسقارۋ سالاسى بويىنشا الەۋمەتتىك جانە عىلىمي زەرتتەۋلەرگە سۇيەنۋ ماڭىزدى. دامىعان ەلدەردە ۇكىمەت قابىلدايتىن شەشىمدەردى عىلىمي تۇرعىدا زەرتتەۋ تۋرالى زاڭدار بار. سول زاڭ ءبىزدىڭ مەملەكەتتىك باسقارۋ جۇيەسىنە دە قاجەت. ءبىز جۇمىس ناتيجەسىن كوبىنە تەك جيىن، باس قوسۋلاردا عانا باياندايمىز. سوندىقتان الدىمەن عىلىمي زەرتتەۋلەرگە نازار اۋدارىپ، عالىمدار قاققان دابىلعا قۇلاق اسۋىمىز كەرەك. قازاقستان مەملەكەتتىك قىزمەت سالاسىن جەتىلدىرۋ مەن ەلەكتروندى قىزمەت بويىنشا حالىقارالىق ساراپشىلاردىڭ ەڭ جوعارى باعاسىن الدى. ولاي بولسا سونىڭ جەمىسىن حالىق نەگە تولىققاندى كورمەي جاتىر؟ وعان تۇساۋ ساياسي جۇيە»، - دەدى ءاليحان بايمەنوۆ ق ر مەملەكەتتىك قىزمەت ىستەرى اگەنتتىگىنىڭ كەڭەيتىلگەن القا وتىرىسىندا.

ونىڭ ايتۋىنشا، مەملەكەتتىك باسقارۋ سالاسىنداعى ساياسي جۇيەنى وزگەرتۋ قاجەت.

«مەملەكەت باسشىسىنىڭ حالىققا جولداۋىندا ادام قۇقىعىمەن قوسا، مەملەكەتتىك باسقارۋ مەن قىزمەتتىڭ تيىمدىلىگىن ارتتىرۋ ماسەلەسى تۇراقتى قوزعالىپ كەلەدى. مەملەكەتتى قۇراتىن ادامدار، سوندىقتان ادامي رەسۋرس - ماڭىزدى فاكتور. وسىعان بايلانىستى پەرسونالدى باسقارۋ قىزمەتىن تولىققاندى HR (ەيچار) بولىمشەلەرگە رەفورمالاۋ جانە زاماناۋي تەحنولوگيالاردى پايدالاناتىن مامانداردى تارتۋ، قولدانىستاعى پەرسونالدى باسقارۋ قىزمەتىندە جۇمىس ىستەيتىن قىزمەتشىلەردى وقىتۋدى جۇرگىزۋ قاجەت»، - دەيدى ول.

بۇگىن ەلوردادا ونلاين فورماتتا ق ر مەملەكەتتىك قىزمەت ىستەرى اگەنتتىگىنىڭ كەڭەيتىلگەن القا وتىرىسى ءوتتى. اتالعان جيىندى اشقان ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ جايلىلىق پەن جىلدامدىق مەملەكەتتىك قىزمەتتىڭ باستى پرينتسيپىنە اينالۋى كەرەكتىگىن ايتتى. سونداي- اق، قازاقستاندىقتاردىڭ مەملەكەتتىك قىزمەت ساپاسىنا قانشالىقتى كوڭىلى تولاتىنى بەلگىلى بولدى. ودان بولەك، قازاقستاندا مەملەكەتتىك قىزمەتتەن شىعۋ ءتارتىبى جەڭىلدەيدى.

اۆتور: ءالي يبرايەۆ