قازاقستاندا مەملەكەتتىك قىزمەتتەن شىعۋ ءتارتىبى جەڭىلدەيدى

نۇر- سۇلتان. قازاقپارات - ەلىمىزدە مەملەكەتتىك قىزمەتكە كىرۋدەگى جوسىقسىز كەدەرگىلەر الىنىپ، ال قىزمەتتەن شىعۋدىڭ ءتارتىبى جەڭىلدەي تۇسپەك.

ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ توقتالىپ ءوتتى، دەپ حابارلايدى قازاقپارات ءتىلشىسى.

«مەملەكەت باسشىسى قاڭتارداعى ءماجىلىس وتىرىسىندا سويلەگەن سوزىندە شەشۋدى تالاپ ەتەتىن ءبىرقاتار ماسەلەلەردى اتاپ ءوتتى. ول كادرلىق الەۋەتتىڭ تومەندىگى، تاپسىرمانى ورىنداۋداعى فورماليزم، سىبايلاس جەمقورلىق، كادرلاردىڭ تۇراقتاماۋى، جاپپاي بيۋراكراتيانىڭ ورىن الۋى جانە شەنەۋنىكتەر مەن حالىقتىڭ اراسىنداعى بايلانىستىڭ تومەندىگى. قوعام مەملەكەتتىك قىزمەتكەر دەگەندە ءوز ىسىنە ادال، ەلگە جاناشىر ادامدى كورگىسى كەلەدى. اگەنتتىك بارلىق مەملەكەتتىك قىزمەتتى تۇبەگەيلى رەتكە كەلتىرۋ بويىنشا اۋقىمدى جۇمىس اتقارۋى ءتيىس»، - دەدى دارحان جازىقبايەۆ اگەنتتىگىنىڭ كەڭەيتىلگەن القا وتىرىسىندا.

ونىڭ ايتۋىنشا، الدا كادرلاردى ىرىكتەۋ جۇيەسىن جەتىلدىرۋ جانە مەملەكەتتىك قىزمەتكە كىرۋ ءۇشىن ارتىق توسقاۋىلداردى الىپ تاستاۋ مىندەتى تۇر.

«وسىعان بايلانىستى ىرىكتەۋ جۇيەسى جەڭىلدەتىلىپ، مەملەكەتتىك قىزمەت بارلىعىنا قولجەتىمدى بولادى. بۇعان قوسا، مەملەكەتتىك قىزمەتتەن «شىعۋ» ءتارتىبى جەڭىلدەتىلەدى. قازىرگى ۋاقىتتا جۇمىستان بوساتۋ ءۇشىن قىزمەتشى قاتارىنان 2 جىل قاناعاتتانارلىقسىز دەپ باعالانۋى قاجەت ەكەنىن بىلەسىزدەر. قىزمەتىن باعالاۋ قورىتىندىلارى بويىنشا جۇمىسىن تومەن اتقارعان دەپ سانالاتىن قىزمەتكەرلەردى جۇمىستان بوساتۋعا تەزىرەك مۇمكىندىك بەرەتىن ەرەجەلەر قالىپتاستىرۋىمىز قاجەت دەپ سانايمىن»، - دەيدى ول.

ودان بولەك، اگەنتتىك باسشىسى مەملەكەتتىك قىزمەتكە قابىلداۋ مەن قىزمەتتىك ساتى بويىنشا وسۋدە مەريتوكراتيا قاعيداتىنا سۇيەنۋ كەرەكتىگىن ايتتى.

«ەلىمىزدە كوپتەگەن تالانتتاردىڭ بارى ەشكىمگە قۇپيا ەمەس. ءارتۇرلى سەبەپتەرگە بايلانىستى، كوبىنەسە ولار بەيمالىم قالىپ جاتادى. ءبىزدىڭ مىندەت - ەلگە قىزمەت ەتكىسى كەلەتىن، ىنتا- تالابى بار ازاماتتارعا مەملەكەتتىك قىزمەتتە جۇمىس اتقارۋعا مۇمكىندىك تۋدىرۋ. بۇل ءۇشىن پرەزيدەنتتىك جاستار كادر رەزەرۆىنە ىرىكتەۋ جۇرگىزۋ جۇمىستارى جالعاساتىن بولادى. سونداي- اق، الداعى ۋاقىتتا، جاستار مەن مەملەكەتتىك قىزمەتشىلەر اراسىنان تالانتتاردى انىقتاۋ ءۇشىن ءتۇرلى حاكاتوندار مەن تاقىرىپتار بويىنشا كونكۋرستار وتكىزۋ ماسەلەسى پىسىقتالادى»، - دەدى د. جازىقبايەۆ.

اۆتور: ءالي يبرايەۆ