قاڭتار تراگەدياسى: ەلۆيرا ءازىموۆا تەرگەۋ كەزىندە كۇيىك جاراقاتىن العانداردىڭ ءىسى تۋرالى پىكىر ءبىلدىردى
«الماتى وبلىسى مەن قالاسىندا بىرنەشە ازاماتتىڭ، ونىڭ ىشىندە كامەلەتكە تولماعان بالالاردىڭ دەنەسىنە كۇيىك جاراقاتى تۇسكەنى تۋرالى مالىمەتتەر رەزونانس تۋعىزدى. ونىڭ ءبارى قازىر ەشقايدا كەتپەۋ تۋرالى قولحات نەمەسە تۋىستارىنىڭ كەپىلگەرلىگى ارقىلى قاماۋدان بوساتىلدى. بۇل فاكتىلەر بويىنشا تەرگەۋ باستالدى. ول جايتتاردىڭ قۇقىقتىق باعاسى سوت-مەديتسينالىق ساراپتامالار مەن مەديتسينالىق قورىتىندىلارعا بايلانىستى بولادى. سونداي-اق، كۋاگەرلەر مەن زارداپ شەگۋشىلەردىڭ بەرگەن جاۋابىنا دا بايلانىستى»، - دەدى ەلۆيرا ءازىموۆا.
ونىڭ ايتۋىنشا، ۇستالعانداردىڭ دەنساۋلىق جاعدايىنا بايلانىستى قاماۋ شارالارىن بالاما شارالارمەن اۋىستىرۋ تۋرالى وتىنىشتەرىدىڭ كوبى قاناعاتتاندىرىلعان.
«ەمدەلۋدى قاجەت ەتەتىن باسقا ۇستالعاندارعا مەكەمەنىڭ ىشىندە مەديتسينالىق قىزمەت كورسەتىلىپ جاتىر. ازاماتتىق مەديتسينا وكىلدەرىنەن قۇرالعان تۇراقتى كوميسسيالار اتالعان مەكەمەلەرگە ۇدايى بارىپ ءجۇر»، - دەدى ادام قۇقىقتارى جونىندەگى ۋاكىل.
