ءاليحان سمايىلوۆ سۋ تاسقىنىنا دايىندىق تۋرالى: مينيسترلىك پەن اكىمدىكتەر جاۋاپكەرشىلىكتى ءبىر- بىرىنە سىلتەپ ءجۇر
پرەمەر- مينيستر ءاليحان سمايىلوۆ تاسقىنعا قارسى دايىندىق ماسەلەسىندە اكىمدىكتەر مەن توتەنشە جاعدايلار مينيسترلىگىنىڭ اراسىندا ۇيلەسكەن جۇمىس جوقتىعىن سىنعا الدى.
«ناۋرىز ايى قالىپتى نورمادان جىلى بولادى دەگەن بولجام بار. دەمەك، قاردىڭ كۇرت ەرۋىنەن ەلدىڭ ءبىرقاتار وڭىرىندەگى جاعداي قيىنداپ كەتۋى مۇمكىن. كەيبىر ايماقتارداعى جاعداي جىلدان- جىلعا قايتالانىپ كەلەدى. بۇل ءبىرىنشى كەزەكتە توتەنشە جاعدايلار مينيسترلىگى مەن جەرگىلىكتى بيلىك اراسىنداعى جاۋاپكەرشىلىكتى ءبىر- بىرىنە سىلتەۋ ماسەلەسىنە قاتىستى بولىپ وتىر»، - دەدى ۇكىمەت باسشىسى.
ونىڭ پايىمىنشا، سۋ تاسقىنىنىڭ الدىن الۋ جانە ودان كەلەتىن شىعىنداردى ازايتۋ اكىمدىكتەردىڭ جۇيەلى جۇمىسىنا تىكەلەي بايلانىستى.
«اكىمدىكتەر كۇندەلىكتى قار شىعارۋ، ۋاقىتشا بوگەتتەردى سالۋ جۇمىستارىن ۋاقتىلى جۇرگىزۋى ءتيىس. توتەنشە جاعدايلارعا جەرگىلىكتى بيۋدجەتتەردە جەتكىلىكتى قاراجات قاراستىرىلۋى كەرەك. سۋ تاسقىنىنىڭ الدىن الۋعا قاتىستى بۇكىل ماسەلەلەردى اكىمدىكتەر قاتاڭ باقىلاۋدا ۇستاۋعا ءتيىس»، - دەدى ءاليحان سمايىلوۆ.
