پەتروپاۆلدا ينتەرنەت الاياقتىقتىڭ جاڭا ءتاسىلى پايدا بولدى
سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 1- اقپان كۇنى پەتروپاۆل تۇرعىنىنا بەلگىسىز بىرەۋ قوڭىراۋ شالىپ، ءوزىن Halyk Bank ءتىڭ وكىلى رەتىندە تانىستىرعان. ول بەلگىسىز ادام ونىڭ اتىنا 4 ميلليون تەڭگەگە نەسيە رەسىمدەمەكشى بولىپ جاتقانىن ايتقان. پەتروپاۆلدىق ايەل سەنىمسىزدىك تانىتقاننان كەيىن، الاياق WhatsApp مەسسەندجەرى ارقىلى نەسيەنىڭ كۇشىن جويۋ تۋرالى «شارت» جولداعان. زارداپ شەگۋشىگە PDF- سۋرەت ناعىز قۇجات سياقتى كورىنگەن، بانكتىڭ لوگوتيپى دە بولعان. قىلمىسكەرگە سەنگەن ايەل ءوزىنىڭ ەسەپ شوتىنا جاسالعان قولسۇعۋشىلىقتى توقتاتۋ ءۇشىن 4 ميلليون تەڭگەگە نەسيە رەسىمدەپ بەرگەن. اقشا قاراجاتىن «ساقتاندىرۋ شوتىنا» اۋدارعان، ال تۇسكەن اقشانى الاياق ءوز كەرەگىنە جاراتقان. جابىرلەنۋشى «شارتتا» ءوزىنىڭ اتى- ءجونى كورسەتىلمەگەنىن كەيىن عانا بايقاعان. الاياقتىڭ قۇربانىنا اينالعانىن تۇسىنگەن ول، پوليتسياعا جۇگىندى.
«پوليسيا قىزمەتكەرلەرىنىڭ ينتەرنەت الاياقتىقتىڭ الدىن الۋعا قاتىستى جۇرگىزگەن جۇمىستارى ءوز ناتيجەسىن بەرىپ جاتىر. ادامدار قاۋىپ تۋرالى حاباردار. دەگەنمەن، قىلمىسكەرلەر ادامداردىڭ سەنىمىنە كىرۋ ءۇشىن جاڭا ايلا- امالداردى ويلاپ تابادى. ولاردىڭ ماقساتى - ادامداردىڭ جەكە قۇپيا مالىمەتتەرىن ءبىلىپ الىپ، قاراجاتىنا قول جەتكىزۋ نەمەسە ولاردىڭ اتتارىنا نەسيە رەسىمدەۋ. قانداي جاعداي بولماسىن، بوگدە ادامعا قۇپيا مالىمەتتەردى، پين- كودتى، sms-حابارلاماممەن كەلەتىن ءبىر رەتتىك قۇپيا ءسوزدى ايتۋعا بولمايدى. تەلەفون ارقىلى تانىس ەمەس تۇلعالارمەن قارجى وپەراتسيالارىن جۇرگىزۋگە بولمايدى. ەگەر قاراجاتىڭىزدىڭ قاۋىپسىزدىگى تۋرالى كۇماندانساڭىز، بانك فيليالىنا بارىڭىز. ەگەر «بانك قاۋىپسىزدىگى قىزمەتىنەن قوڭىراۋ» تۇسسە، اڭگىمەنى دەرەۋ دوعارىڭىز، بۇل - الاياقتار»، - دەيدى پەتروپاۆل قالاسى پوليسيا باسقارماسىنىڭ باستىعى جاندوس مۇقاتوۆ.
