پۋتين دونباستاعى احۋالعا قاتىستى قاۋىپسىزدىك كەڭەسىنىڭ وتىرىسىن وتكىزدى

نۇر-سۇلتان.قازاقپارات - رەسەيلىك ساياساتكەرلەر ەل پرەزيدەنتى ۆلاديمير پۋتيننەن ۋكراينانىڭ شىعىسىنداعى دونەسك پەن لۋگانسك حالىق رەسپۋبليكالارىن مويىنداۋدى سۇرادى.

بۇل ءوتىنىش قاۋىپسىزدىك كەڭەسىنىڭ وتىرىسىندا ايتىلدى. ءوز كەزەگىندە ۆلاديمير پۋتين اتالعان ماسەلەگە قاتىستى شەشىم بۇگىن قابىلداناتىنىن جەتكىزدى. وتىرىس بارىسىندا دونەتسك پەن لۋگانسك حالىق رەسپۋبليكالارىن تانۋعا قاتىستى سىرتقى رەاكسياعا رەسەيدىڭ بۇرىننان دايىندالىپ كەلە جاتقانى دا ايتىلدى. بۇعان قوسا، دونباستىڭ ءبىر ميلليوننان استام تۇرعىنى رەسەي ازاماتتىعىن الۋعا ءوتىنىشى ءبىلدىرىپتى. بۇعان دەيىن ءوزىن رەسپۋبليكا رەتىندە جاريالاعان لۋگانسك جانە دونەتسك حالىق رەسپۋبليكالارىنىڭ باسشىلارى رەسەي پرەزيدەنتىنەن تاۋەلسىزدىكتەرىن مويىنداۋدى سۇراعان بولاتىن

سەرگەي شويگۋ، ر ف قورعانىس ءمينيسترى:

- ءبىر ءتۇننىڭ ىشىندە 40 تان استام اتىس بولدى. كورىپ وتىرعانىمىزداي جانە مامانداردىڭ بايانداماسىنا سايكەس ءبارى الدىن الا بەلگىلەنگەن نىسانالارعا جاسالعان. ياعني ولار قايدا اتىپ جاتقاندارىن بىلەدى.

دميتري مەدۆەديەۆ، ر ف قاۋىپسىزدىك كەڭەسى ءتوراعاسىنىڭ ورىنباسارى:

- مەن مىنانى اتاپ وتكىم كەلەدى. قاراپايىم بولىپ كورىنگەنىمەن، وتە ماڭىزدى نارسە. قازىرگى ۋاقىتتا مويىندالماعان ەكى قۇرىلىمنىڭ اۋماعىندا رەسەي فەدەراتسياسىنىڭ 800 مىڭعا جۋىق ازاماتى ءومىر ءسۇرىپ جاتىر. مەنىڭ ايتپاعىم، ولار ءبىز ۇنەمى قورعايتىن، قامقورلىق جاساپ، كومەكتەسەتىن ورىس ۇلتىنىڭ وكىلدەرى ەمەس، رەسەي ەلىنىڭ ازاماتتارى.

www.24.kz