دونباستاعى جاعداي شيەلەنىسىپ تۇر

نۇر-سۇلتان.قازاقپارات - ۋكراينا مەن ەۋرووداق ۋكراين جەرىندە كونسۋلتاتيۆتى اسكەري ميسسيا قۇرۋ تۋرالى كەلىسىمگە كەلدى.

ول ەۋروپالىق وداق ەلدەرى، سىرتقى ىستەر مينيسترلەرىنىڭ وتىرىسى قارساڭىندا قابىلداندى. ال ءوزىن ءوزى جاريالاعان دونەتسك جانە لۋگانسك حالىق رەسپۋبليكالارى ايماقتاعى احۋالدىڭ ۋشىققانىن حابارلاپ جاتىر، دەپ حابارلايدى «حابار 24».

رەسەي تاراپى تاراتقان مالىمەتكە سايكەس، وسى ۋاقىتقا دەيىن 60 مىڭداي ادام شۇعىل جاعدايدا رەسەي اۋماعىنا وتكەن. دونەتسك پەن لۋگانسك باسشىلىعى وزدەرى باقىلايتىن اۋماقتا جاپپاي موبيليزاتسيا جاريالادى. ويتكەنى ۋكراينانىڭ قارۋلى جاساعى اتىس باستاعان كورىنەدى. دونەتسك حالىق رەسپۋبليكاسىنىڭ باسشىسى دەنيس پۋشيليننىڭ ايتۋىنشا، كەيىنگى بىرنەشە كۇندە تۇرعىن ءۇي اۋداندارىنا 1700 دەن استام مينا مەن سنارياد اتىلعان. ءبىراق ۋكراينا تاراپى بۇل ايىپتاۋلاردى جوققا شىعاردى. قازىر ون مىڭداعان بوسقىندى رەسەي اۋماعىنا ەۆاكۋاتسيالاۋ ءجۇرىپ جاتىر.

دونەتسك بيلىگىنىڭ ايتۋىنشا، شامامەن 700 مىڭ تۇرعىندى رەسەيگە كوشىرۋ كوزدەلگەن. ءبىراق بوسقىندار لەگىنىڭ كۇرت ارتۋىنا بايلانىستى رەسەيدىڭ شەكارا ماڭىنداعى ايماقتاردا توتەنشە جاعداي جاريالانعان. بۇگىن بريۋسسەلدە ەۋرووداق ەلدەرى سىرتقى ىستەر مينيسترلەرىنىڭ وتىرىسى باستالدى. جيىنعا جينالعاندار ۋكرايناداعى احۋالدى تالقىعا سالماق. وعان ۋكراينا سىرتى ىستەر ءمينيسترى دميتري كۋلەبا دا قاتىسادى. دميتري كۋلەبا، ۋكراينا سىرتقى ىستەر ءمينيسترى - بۇگىن مەن ارىپتەستەرىمە رەسەيگە قارسى شارا قابىلدايتىن كەز كەلگەنىن ايتقىم كەلەدى. ول ءۇشىن سەبەپ بار. ءبىز ا ق ش پەن رەسەي اراسىنداعى ءسامميتتى قۇپتايمىز. بۇعان دەيىن امەريكانىڭ مەملەكەتتىك حاتشىسى ەنتوني بلينكەن ۋكرايناعا قاتىستى بارلىق شەشىم ءبىزسىز قابىلدانبايتىنى تۋرالى مالىمدەگەن بولاتىن.

جوزەپ بوررەل، ە و- نىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى:

- سوعىستى بولدىرماۋعا باعىتتالعان كەز كەلگەن فورماتتاعى كەزدەسۋ اسا ماڭىزدى. مەيلى ول پرەزيدەنتتەر دەڭگەيىندە، مەيلى مينيسترلەر دەڭگەيىندە بولسىن. ديپلوماتيالىق كەلىسسوزدەر داعدارىستى شەشۋدىڭ جالعىز جولى، سوندىقتان ول قادامدى قۇپتايمىز.

ءبىرقاتار مەملەكەتتە ۋكراينانى قولداۋ اكسيالارى ءوتتى

ۋكرايناداعى احۋالدىڭ ۋشىعۋىنا بايلانىستى الەمنىڭ ءبىرقاتار ەلىندە ۋكراينا حالقىن قولداۋ اكتسيالارى ءوتىپ جاتىر.

ۆارشاۆادا قولدارىنا پلاكات پەن ۋكراينا تۋىن ۇستاپ شىققان جۇزدەگەن تۇرعىن ورتالىق الاڭعا جينالىپ، رەسەيدىڭ ۋكرايناعا باسىپ كىرۋ قاۋپىنە قارسى نارازىلىق تانىتتى. ءدال وسىنداي شارا مادريدتە دە ۇيىمداستىرىلدى. كوشەگە شىققان ۋكراين قاۋىمداستىعى ءوز ەلدەرىندە بولىپ جاتقان جاعدايعا الاڭداۋشىلىق ءبىلدىردى. ال ا ق ش- تىڭ ۆاشينگتون قالاسىندا ونداعان دەمونسترانت تاراپتاردى بەيبىتشىلىككە شاقىرىپ، اق ۇيگە دەيىن ءجۇرىپ ءوتتى. ال Lufthansa i Swiss Air سەكىلدى اۋە كومپانيالارى ءتىپتى ۋكرايناعا ۇشپايتىن بولدى.

www.24.kz