ورالدا العاش رەت ۇلتتىق سپورت تۇرلەرىنەن اكەلەر مەن بالالار اراسىندا جارىس ءوتتى

ورال. قازاقپارات - بالالار جىلى اياسىندا «ورال» سپورت كلۋبىنىڭ ات سپورتى بولىمىندە ۇلتتىق سپورت تۇرلەرىنەن العاش رەت اكەلەر مەن بالالار اراسىندا جارىس ءوتتى، دەپ حابارلايدى قازاقپارات ءتىلشىسى.

«ورال» سپورت كلۋبىنىڭ ديرەكتورى ەسقابىل جالمۇرزيەۆتىڭ ايتۋىنشا، اتالمىش جارىس ۇلتتىق سپورتتى دامىتۋ، وتباسى قۇندىلىقتارىن دارىپتەۋ ماقساتىندا ۇيىمداستىرىلدى.

وڭىرگە تانىمال سپورت ارداگەرلەرى رۋسلان مىرزاشيەۆ پەن قۋانىش ۋاقاسوۆ بالالارعا باتاسىن بەرسە، وليمپيادا رەزەرۆىنىڭ وبلىستىق مامانداندىرىلعان مەكتەپ-ينتەرنات كوللەدجى ديرەكتورى قانات جانعاليەۆ ات سپورتىنىڭ ادام ومىرىندەگى، بالا دامۋىنداعى ماڭىزى زور ەكەندىگىن جەتكىزدى.

اكەلى-بالالى 12 جۇپ ساداق اتۋ، سەركە ءىلۋ، كەرمەگە تارتىلۋ، اۋدارىسپاق سىندى ناعىز جىگىتتەر سايىسىنا ءتۇسىپ، سالت-ءداستۇر، ات سپورتى مەن جىلقىعا قاتىستى ساۋالدارعا جاۋاپ بەردى.

بۇل كۇنى اكەلەر ءوز ۇلدارىنىڭ ات جالىن تارتىپ، ۇلتتىق سپورت تۇرلەرىنە توسەلگەنىن كورىپ، وزدەرى دە نامىسقا تىرىستى.

اسىرەسە، اۋدارىسپاقتا، سەركە ىلۋدەگى بالالارىنىڭ ەپتىلىگىنە ءتانتى بولدى. جينالعان جۇرتشىلىق ات سپورتى ناعىز بىلەكتى، جۇرەكتى جىگىتتەردىڭ ءىسى ەكەنىنە تاعى ءبىر كوز جەتكىزدى.

شارانىڭ ماقساتى دا ات جالىن تارتىپ، اتا جولىن قۋعان جەتكىنشەكتەردىڭ ءىسىن اكەلەرگە كورسەتۋ، ەكى اراداعى بەرىك قارىم-قاتىناستى نىعايتۋ بولاتىن.

سايىس قورىتىندىسىندا ورالحان باقتىگەرەيەۆ پەن ونىڭ ۇلى نۇرداۋلەت ماعزوم جەڭىمپاز اتاندى. ءابىلقايىر احمەتوۆ پەن دياس سۇيىنعارايەۆ ەكىنشى، نۇرلان احمەشيەۆ پەن ارسەن مۇراتقالي ءۇشىنشى ورىنعا يە بولدى.

جۇلدەگەرلەر ديپلوممەن، جارىسقا قاتىسۋشىلار العىسحات، باعالى سىيلىقتارمەن ماراپاتتالدى.