قىز بالاسىنىڭ ساياحاتتاعى قاۋىپسىزدىگى
1. قىز بالاسى ساياحاتقا جالعىز شىقپاۋعا تىرىسقانى ابزال. مۋمكىندىك بولسا قۇربىلارىڭىزبەن، دوستارىڭىزبەن، جاقىندارىڭىزبەن، اتا-اناڭىزبەن بارعان ءجون. جالعىز بارساڭىز وتە ساق بولعانىڭىز دۇرىس.
2. مىندەتتى تۇردە، باراتىن جەردى الدىن الا ينتەرنەتتەن قاراپ زەرتتەپ الىڭىز، ساياحاتتاپ جۇرگەن تانىستارىڭىزدان سۇراڭىز.
3. قىدىرعاندا، كەشكى سەرۋەنگە شىققاندا كوشەسى تار، ادامدار سيرەك جۇرەتىن اۋدانداردان الىس بولىڭىز. مۇمكىندىگىنشە ورتالىق كوشەدە، باقىلاۋ قىزمەتىنىڭ بولىمشەسى ورنالاسقان، پوليتسەيلەر جۇرگەن، ادام كوپ جەرلەردە جۇرۋگە تىرىسىڭىز. بومجدار جاتقان جەرلەردەن اينالىپ ءوتىڭىز. پاركتەرگە، ورماندارعا بارعاندا قۋىستارعا بارماعان ءجون.
4. ەر ادامدار توقتاتسا، «قىلمىڭداسا» بىردەن اۋلاق ءجۇرىڭىز. ساياحاتقا التىن القا، سىرعا، جۇزىكتەرىڭىزدى تاعىپ بارماڭىز. اقشاڭىزدى سومكەنىڭ ءار جەرىنە ءبولىپ ساقتاڭىز.
5. تەلەفونىڭىز ءار كەز زاريادتاۋلى جانە اقشاڭىز بولعانى دۇرىس. كەز كەلگەن جاعدايدا وسى نارسەلەر ارقىلى جول تابۋعا بولادى. كوشەدەن تاكسي توقتاتپاڭىز، رەسمي تاكسيلەرگە وتىرىڭىز. قوعامدىق كولىككە وتىرعاندا سومكەڭىزگە، ۇيالى تەلەفونىڭىزعا ساق بولىڭىز.
6. ءبىر نارسەدەن، ادامنان، اۋداننان كۇدىكتەنسەڭىز، بىردەن كەرى قايتۋعا شەشىم قابىلداڭىز. ساياحاتقا شىعاتىنىڭىزدى جاقىندارىڭىزعا ءجيى حابارلاپ وتىرىڭىز. باراتىن ەلىڭىزدەگى قازاقستان ەلشىلىگىنىڭ تەلەفونىن ءبىلىڭىز.
7. ۇشاقتان كەشىگىپ، ءبىر جاعداي بولسا ساسقالاقتاماڭىز، ۋايىمداماڭىز، اقشا تابىلادى، باستىسى باس اماندىعىڭىز. ءبىر-ەكى اپتالىق ساياحاتقا كوپ جۇك، كيىم الماڭىز، سەبەبى كوپ جۇك ارتىق پروبلەما، بارىنشا از كيىممەن ساياحاتتاڭىز.
8. ەلدە ساياسي احۋالدى قاراڭىز. بارار ەلىڭىزدە سوعىس، ميتينگ، قاقتىعىس بولسا بارماڭىز. ەلدىڭ ءدىنى مەن سالت-داستۇرىنە ساقتىقپەن قاراڭىز. مۇسىلمان ەلدەرىندە تىم اشىق كيىممەن جۇرمەڭىز.
9. جالپى قىز بالاسى ءۇشىن ەلدىڭ كوبى قاۋىپسىز. ءبىراق قالانىڭ ورتاسىنان، تۋريستەر كوپ جۇرەتىن جەرلەرگە بارىڭىز. جالعىز ساياحاتتان گورى جانىڭىزدا سەرىكتەرىڭىز بولعانى جاقسى.
