ۇلتتىق كونكيشىلەر فەدەراتسياسىندا ۆيتسە-پرەزيدەنت لاۋازىمى الىنىپ تاستالدى
«ەل چەمپيوناتى 2022-جىلدىڭ جەلتوقسان ايىندا وتەدى. قاتىسۋشىلارعا شارانىڭ وتەتىن ورنى مەن ناقتى كۇنى كەيىنىرەك ايتىلادى»، - دەپ حابارلادى فەدەراتسيادان.
ۇيىم مالىمەتىنشە، فەدەراتسيانىڭ ۆيتسە-پرەزيدەنتى وكسانا تەن 21-23- اقپان ارالىعىندا الماتىدا مانەرلەپ سىرعاناۋدان قازاقستان چەمپيوناتى وتەتىنى تۋرالى وڭىرلەرگە جىبەرىلەتىن جەدەلحاتقا قول قويعان. بۇل قۇجات بۇگىنگى كۇنى جارامسىز دەپ تانىلدى.
«فەدەراتسيا ۆيتسە-پرەزيدەنتتەرىنىڭ مورگە قول قويۋعا جانە پايدالانۋعا، سونداي-اق جەكە شەشىم قابىلداۋعا قۇقىعى جوق. رەسپۋبليكالىق جارىستاردى وتكىزۋ تۋرالى ەرەجە سپورتشىلاردىڭ مۇددەلەرى مەن جاتتىقتىرۋشىلار قۇرامىنىڭ پىكىرىن ەسكەرە وتىرىپ، القا جيىنىندا قارالادى. فەدەراتسيامەن كەلىسىلىپ، مادەنيەت جانە سپورت مينيسترلىگىنە بەكىتۋگە جىبەرىلەدى»، - دەپ اتاپ ءوتتى ۇلتتىق كونكيشىلەر فەدەراتسياسى.
ەسكە سالايىق، 11- اقپاندا ۇيىمنىڭ قۇرىلتاي جينالىسىنىڭ قورىتىندىسى بويىنشا ۆيتسە-پرەزيدەنتتەر لاۋازىمى جويىلدى.
«فەدەراتسيا رەفورمالار مەن وزگەرىستەردىڭ ۋاقىتى كەلگەنىنە سەنىمدى. مانەرلەپ سىرعاناۋ ءار ادام ءۇشىن ناقتى جاۋاپكەرشىلىك ايماقتارى بار ناقتى شەشىم قابىلداۋ جۇيەسىن قاجەت ەتەدى. كوماندادا جۇمىس ىستەي الاتىن، سپورتشىلاردىڭ دايىندىعى مەن ءوسۋىن ناقتى قالىپتاستىراتىن، قارجىلاندىرۋدىڭ اشىق جۇيەسى مەن ءادىل تورەلىك ەتەتىن ءتيىمدى مەنەدجەرلەردىڭ ۋاقىتى كەلدى. سونىمەن قاتار، فەدەراتسيا و. ا. تەن اتقارعان جۇمىسى مەن مانەرلەپ سىرعاناۋ سپورتىنىڭ دامۋىنا قوسقان ۇلەسى ءۇشىن العىس ايتادى»، - دەلىنگەن ۇ ك ف حابارلاماسىندا.
بۇعان دەيىن ۇلتتىق كونكيشىلەر فەدەراتسياسىنىڭ ۆيتسە-پرەزيدەنتى وكسانا تەن قىزمەتىن بوساتۋ تۋرالى ۇستىنەن جازىلعان ارىزعا بايلانىستى باسپا ءسوز ءماسليحاتىن وتكىزگەن بولاتىن.
