اۋىل شارۋاشىلىعى ونىمدەرى وندىرۋشىدەن تۇتىنۋشىعا تىكەلەي ءارى تەز جەتۋى ءتيىس - ءانۋار نۇرتازين
بۇل قاراپايىم ادامداردىڭ اقشاسىن الاياقتىق ارەكەتتەر ارقىلى جىمقىرۋدىڭ الدىن الادى. اتالعان ساراپشىلىق ويدى ەكونوميكالىق شولۋشى ءانۋار نۇرتازين ورتاعا سالدى، دەپ حابارلايدى قازاقپارات ءتىلشىسى.
«جاھاندىق ەكونوميكالىق داعدارىس كەزەڭىندەگى ەكونوميكانىڭ ەڭ تۇراقتى سەكتورلارىنىڭ ءبىرى - اۋىل شارۋاشىلىعى. جەر جانە ونداعى رەسۋرستار مەملەكەتتىڭ ەڭ ماڭىزدى جانە نەعۇرلىم قۇندى اكتيۆى. جانە ءبىر سەبەپ ەلدىڭ جاعدايى حالىقتى ازىق- تۇلىك قاۋىپسىزدىگىمەن قامتۋمەن بايلانىستى. وسى ورايدا كەلەسى جايتتارعا ءمان بەرگەن ءجون. وڭىرلەردىڭ جەر قورىن پايدالانىلۋىنا ريەۆيزيا جۇرگىزۋدى اياقتاپ، جەرگىلىكتى ءوزىن- ءوزى باسقارۋ مەن جەردى ءبولۋدىڭ اشىق تەتىكتەرىن ازىرلەۋ كەرەك. ۇساق تاۋار وندىرەتىن كاسىپكەرلىكتەن باستاپ، ءىرى اگرارلىق شارۋاشىلىقتاردىڭ تەڭدىگى مەن ماڭىزدىلىعىن تانۋ. بۇل جەردە وندىرىسپەن اينالىساتىن شارۋاشىلىقتىڭ دەڭگەيىنە قاراي مەملەكەتتىك قولداۋ شاراسىن ايقىنداۋعا بولادى»، - دەدى ءانۋار نۇرتازين.
سونداي- اق، شولۋشى قازاقستاندا تولىققاندى ازىق- تۇلىك حابىن قالىپتاستىرۋدى جەدەلدەتۋ كەرەكتىگىن ايتتى.
«وڭىرلەردىڭ لوگيستيكالىق الەۋەتىن ەسكەرە وتىرىپ ازىق- تۇلىك حابىن قالىپتاستىرۋدى تەزدەتۋ كەرەك. بۇل توتەنشە جاعداي كەزىندە بەلگىلى ءبىر ايماققا كومەك كورسەتۋ كەزىندە مەملەكەتتىك قولداۋ مەن تۇتاستىقتىڭ فاكتورى. ياعني ازىق- تۇلىك ءوندىرىسىنىڭ ورنىقتى جۇيەسىن قۇرۋ قاجەت. بۇل دەگەنىمىز جىلىجاي كەشەندەرى، سۋارمالى جەرلەر جانە ءونىمدى مال شارۋاشىلىعى. سونىمەن قاتار الەۋمەتتىك ماڭىزى بار ازىق- تۇلىك ونىمدەرىنە باعانى تۇراقتاندىرۋدا ديرەكتيۆتى ادىستەرمەن عانا ەمەس، ساۋدا سالاسىنداعى مونوپوليزاتسيا دەڭگەيىن تومەندەتۋدىڭ نارىقتىق تەتىكتەرىن ەنگىزۋ ارقىلى جۇزەگە اسىرعان ءجون. اۋىل شارۋاشىلىعى ونىمدەرى وندىرۋشىدەن تۇتىنۋشىعا تىكەلەي ءارى تەز جەتۋى ءتيىس»، - دەيدى ول.
ودان بولەك، ەكونوميست بيزنەستىڭ دامۋىندا كەدەرگىنىڭ بولماۋى ماڭىزدى ەكەنىن ەسكە سالدى.
«وڭىرلىك دەڭگەيدە قاجەتتى جاعدايلار جاساپ، بيزنەستى دامىتۋعا باعىتتالاتىن مەملەكەتتىك قارجىنى ءتيىمدى يگەرۋگە كەدەرگى كەلتىرەتىن توسقاۋىلداردى الىپ تاستاۋ قاجەت. حالىققا قارجى ونىمدەرى جانە سالىمدار ءۇشىن تارتىمدى جوبالاردى ازىرلەپ، ۇسىنۋ كەرەك. بۇل قاراپايىم ادامداردىڭ اقشاسىن الاياقتىق ارەكەتتەر ارقىلى جىمقىرۋدىڭ الدىن الادى. جانە وتاندىق، اسىرەسە ۇساق ينۆەستورلاردىڭ جۇمىسىنا جان بىتىرەدى. ينۆەستيتسيالىق الاڭداردىڭ ءتيىمدى جانە الەمدە تانىلعان ۇلگىلەرىنىڭ ترانسفەرتىن جۇرگىزۋ دە ماڭىزدى. بۇگىنگى تاڭدا ينۆەستورلار سالىقتىق جانە باسقا دا جەڭىلدىكتەرگە عانا ەمەس، سونىمەن قاتار بيۋروكراتياسىز جانە سىبايلاس جەمقورلىقسىز ءوز جوباسىن جۇزەگە اسىرۋعا مۇمكىندىك بەرەتىن قولايلى ينۆەستيتسيالىق ورتاعا مۇقتاج»، - دەيدى ءا. نۇرتازين.
ونىڭ ايتۋىنشا، جوعارىدا اتالعان شارالار مەملەكەت باسشىسىنىڭ تاپسىرماسىنا سايكەس ينفلياتسيالىق قىسىمدى ازايتىپ، ونىمەن كۇرەستە قاتەلىكتەردى قايتالاماۋعا مۇمكىندىك بەرەدى.
اۆتور: ءالي يبرايەۆ
