قاڭتار وقيعاسىنان كەيىن كەك الۋعا نەمەسە جىكشىلدىك جاساۋعا ۇمتىلمايمىن - پرەزيدەنت
پرەزيدەنت اقوردا رەزيدەنسياسىندا ءبىرقاتار مەملەكەت ەلشىلەرىنەن سەنىم گراموتالارىن قابىلداۋ راسىمىندە جىل باسىندا ىشكى جانە سىرتقى دەسترۋكتيۆتى كۇشتەر قازاقستانعا اۋىر ءارى قاتىگەزدىكپەن شابۋىل جاساعانىن ەسكە سالدى. قاسىم- جومارت توقايەۆ قازاقستاندىقتاردىڭ تاباندىلىعى مەن ۇجىمدىق پاراساتتىلىعىنىڭ ارقاسىندا مەملەكەتتىك توڭكەرىس جاساۋشىلارعا تويتارىس بەرىلگەنىن، ال بۇلىكشىلەر مەن بۇزاقىلاردىڭ جاۋاپقا تارتىلعانىن جەتكىزدى.
«قاڭتار وقيعاسىنان كەيىن مەن كەك الۋعا نەمەسە جىكشىلدىك جاساۋعا ۇمتىلمايمىن. ەل پرەزيدەنتى رەتىندە قازاقستان ازاماتتارىنىڭ جىككە ءبولىنۋىن ەمەس، بىرىگۋىن اسا ماڭىزدى باسىمدىق سانايمىن. سوندىقتان جاڭا قازاقستان تۇجىرىمداماسىن ۇسىندىم. بۇل قۇجات ەتنوسارالىق كەلىسىم مەن كوپۆەكتورلى سىرتقى ساياسات سياقتى ايقىن جەتىستىكتەرىمىزدەن باس تارتپاي، وتكەن كەزەڭدە جىبەرىلگەن ادىلەتسىزدىكتەردەن قۇتىلۋعا نەگىزدەلگەن. مەنىڭ جاسامپاز جۇرتىم بۇل سىناقتان بۇرىنعىدان دا كۇشتى، بەرەكەلى، بولاشاعىنان ءۇمىت كۇتەتىن جانە ءوز مەملەكەتتىلىگىن، ەگەمەندىگىن جانە اۋماقتىق تۇتاستىعىن ساقتاۋعا بەلىن بەكەم بۋعان حالىق بولىپ شىعادى»، - دەدى قاسىم- جومارت توقايەۆ.
قازاقستان پرەزيدەنتى حالىقارالىق سەرىكتەستەرىن ەلىمىز باستان وتكەرىپ وتىرعان وسىنداي سىن ساعاتتا قازاقستانعا دەگەن بەرىك ىنتىماقتاستىعىن تانىتۋعا شاقىردى.
«مەنىڭ اكىمشىلىگىم ءوز تاراپىنان اۋقىمدى ساياسي جانە ەكونوميكالىق رەفورمالاردى جۇزەگە اسىرادى، ينۆەستيتسيالىق كەلىسىم- شارتتارعا قول سۇعىلماۋىن قامتاماسىز ەتەدى جانە سىبايلاس جەمقورلىقپەن توقتاۋسىز كۇرەسەدى. سىزدەردى پاندەميادان كەيىنگى كەزەڭدە وزدەرىڭىزدىڭ ديپلوماتيالىق جانە ساياسي مول تاجىريبەلەرىڭىزدى ەكىجاقتى قاتىناستارىمىزدى جاڭا بيىككە كوتەرۋ ءۇشىن پايدالانۋعا شاقىرامىن. قازاقستان سىزدەردىڭ مەملەكەتتەرىڭىزبەن اراداعى ەكىجاقتى جانە كوپجاقتى بايلانىستاردى ودان ءارى جان- جاقتى نىعايتۋعا دايىن، - دەدى مەملەكەت باسشىسى.
ايتا كەتەيىك، اقوردادا 7 مەملەكەتتىڭ توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن تاپسىرۋ ءراسىمى ءوتتى.
اۆتور: ايجان سەرىكجان قىزى
