ىشكى ىستەر مينيسترلىگى قىلمىس ءجيى بولاتىن وڭىرلەردى اتادى

نۇر-سۇلتان. قازاقپارات - ەلىمىزدە قىلمىس ءجيى تىركەلەتىن ايماقتار بەلگىلى بولدى، دەپ حابارلايدى قازاقپارات ءتىلشىسى.

«ىشكى ىستەر مينيسترلىگى ەلىمىزدە احۋالدى تۇراقتاندىرۋ، قوعامدىق ءتارتىپتى جانە قاۋىپسىزدىكتى قالپىنا كەلتىرۋ بويىنشا ءبىرقاتار شارا قابىلدان جاتىر. جەكە قۇرام ەرەكشە رەجيم جاعدايىندا قوعامدىق ءتارتىپتى ساقتاۋدى جالعاستىرۋدا. بارلىق ەلدى مەكەندەردە پاترۋلدەۋ جاساقتارى كۇشەيتىلگەن. ەلدىڭ بارلىق ايماقتارىندا «قۇقىقتىق ءتارتىپ» جەدەل- پروفيلاكتيكالىق شاراسى ءوتىپ جاتىر. ماقساتى - جەدەل احۋالدى ساۋىقتىرۋ، زاڭدىلىق پەن قۇقىقتىق ءتارتىپتى قامتاماسىز ەتۋ، سونداي- اق توتەنشە جاعداي سالدارىن جويۋ»، - دەدى ق ر ءى ءى م اكىمشىلىك پوليتسيا كوميتەتى باسقارما باسشىسىنىڭ ورىنباسارى داۋرەن قوزىباقوۆ ونلاين وتكەن بريفينگتە.

مينيسترلىكتىڭ مالىمەتىنە سايكەس، «قۇقىقتىق ءتارتىپ» جەدەل- پروفيلاكتيكالىق شاراسى بارىسىندا 13 مىڭنان استام قىلمىس تىركەلگەن.

«ونىڭ ىشىندە 1 مىڭنان استام قىلمىس قوعامدىق ورىنداردا جانە 260 ى كوشەدە بولدى. قىلمىس ءجيى جاسالاتىن وڭىرلەرگە كەلسەك ش ق و (1454)، الماتى (1315)، الماتى وبلىسى (1227)، قاراعاندى (1118)، شىمكەنت (1108) جانە س ق و (1005).

سونداي-اق، 8 مىڭنان استام قىلمىس ءىزىن سۋىتپاي اشىلدى. مىسالى، جامبىل وبلىسىنىڭ شۋ قالاسىندا 1995 -جىلى تۋعان ازامات ۇستالدى، ول تۇندە «مياتا» ءدامحاناسىندا 3 ازاماتتى ولتىرمەكشى بولعان (1995، 1991 جانە 1983). زارداپ شەككەن ازاماتتار اۋرۋحاناعا جاتقىزىلدى»، - دەيدى ول.