ەلوردادا تاكسي جۇرگىزۋشىلەرىن الداۋىنا ءتۇسىرىپ، شىعىنعا ۇشىراتىپ كەلگەن الاياق جىگىت ۇستالدى

نۇر-سۇلتان. قازاقپارات - ەلوردالىق پوليتسيا دەپارتامەنتىنىڭ كريمينالدىق پوليتسيا ءبولىمىنىڭ قىزمەتكەرلەرى الاياق ەر ادامدى ۇستادى، دەپ حابارلايدى قازاقپارات نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

جەدەل-ىزدەۋ شارالارىن جۇرگىزۋ كەزىندە بۇرىن الاياقتىق جاساعانى ءۇشىن قىلمىستىق جاۋاپكەرشىلىككە تارتىلعان 26 جاستاعى ەر ادام ۇستالدى. ەلوردانىڭ پوليتسيا قىزمەتىنە تاكسي جۇرگىزۋشىلەرىنەن 6 ارىز كەلىپ ءتۇستى. ولار كليەنتتىڭ وزدەرىن الداپ، 5-15 مىڭ كولەمىندەگى اقشانى يەمدەنىپ العانىن ايتتى. جابىرلەنۋشىلەردىڭ بارلىعى ءبىر سحەمامەن الداندى.

«كليەنت» موبيلدى قوسىمشا ارقىلى مەكەن-جايعا سالەمدەمە جەتكىزۋ ءۇشىن تاكسي شاقىرتتى. اڭگىمە بارىسىندا ول جۇرگىزۋشىدەن اقشا الىپ، جەتكىزۋ كەزىندە ونىمەن سالەمدەمەنى ساتىپ الۋشى ەسەپ ايىرىساتىنىن ۋادە ەتكەن. وعان كەلىسكەن تاكسي جۇرگىزۋشىلەرى اتالعان مەكەن- جايعا كەلىپ، سالەمدەمەنى ساتىپ الۋشىلاردى تاپپاعان سوڭ، «كليەنتكە» حابارلاسقاندا، ول تەلەفونىن ءوشىرىپ تاستاعان.

قازىرگى ۋاقىتتا بارلىق فاكتىلەر بويىنشا قازاقستان رەسپۋبليكاسى قىلمىستىق كودەكسىنىڭ 190-بابىمەن (الاياقتىق) تەرگەۋ جۇرگىزىلۋدە. پوليتسەيلەر الاياق ارەكەتىنەن زارداپ شەككەن تاكسي جۇرگىزۋشىلەرى الدەقايدا كوپ بولا الاتىنىن اتاپ وتۋدە.

جابىرلەنۋشىلەردى نۇر-سۇلتان قالاسى «الماتى» اۋداندىق پوليتسيا باسقارماسىنا (جانسۇگىروۆ كوشەسى،2) كەلۋىن نەمەسە 87172716710، 716711 جانە 102 تەلەفون نومىرلەرىنە حابارلاسۋى كەرەك.