قورعانىس ءمينيسترى وڭتۇستىك وڭىرلەردە وق- دارىلەردىڭ ساقتالۋ جاعدايىن تەكسەردى
ۆەدومستۆونىڭ باسپا ءسوز قىزمەتىنەن ءمالىم ەتكەندەي، ساپار بارىسىندا مەملەكەت باسشىسىنىڭ تاپسىرماسىن ورىنداۋ اياسىندا قارۋ- جاراق پەن وق- دارىلەردى ساقتاۋ شارالارىنا باستى نازار اۋدارىلدى. بۇل «قاۋىپسىز ەل» ۇلتتىق جوباسىن جۇزەگە اسىرۋدىڭ نەگىزگى باعىتتارىنىڭ ءبىرى. سونىمەن بىرگە، قۇرامىنا قورعانىس ءمينيسترىنىڭ ورىنباسارى رۋسلان شپەكبايەۆ، قۇرلىق اسكەرلەرىنىڭ باس قولباسشىسى تالعات قويباقوۆ، وق- دارىلەر باس باسقارماسىنىڭ باستىعى اندرەي تيحونەنكو ەنگەن قورعانىس ۆەدومستۆوسىنىڭ كوميسسياسى ارىس گارنيزونىن اينالىپ ۇشىپ ءوتتى.
«وق- دارىلەردى ساقتاۋ شارتتارى، سونداي- اق ارسەنالدىڭ تەحنيكالىق اۋماعىن تازارتۋ جانە جارىلعىش زاتتاردى جويۋ بويىنشا جۇمىستاردى جالعاستىرۋعا دايىندىق شارالارى تەكسەرىلدى. ينجەنەرلىك- ساپەرلىك بولىمشە تەحنيكالىق اۋماقتىڭ 463 گەكتارىنا تازارتۋ جۇمىستارىن جۇرگىزدى، بۇل جالپى اۋماقتىڭ % 87 استامىن قۇرايدى. اتالعان جۇمىستار الداعى ناۋرىز ايىندا قايتا جانداناتىن بولادى. كومانديرلەر مينيسترگە تاپسىرمالارى تۋرالى، جاۋىنگەرلىك مۇمكىندىكتەرى، اسكەري بولىمدەردىڭ جاساقتالۋى مەن جاراقتاندىرىلۋى، ىستەردىڭ اعىمداعى جاعدايى مەن تۋىنداعان تۇيتكىلدى ماسەلەلەر جايىندا باياندادى»، - دەلىنگەن باسپا ءسوز بايانىندا.
سونداي- اق رۋسلان جاقسىلىكوۆ جاۋىنگەرلىك دايارلىقتىڭ وقۋ- ماتەريالدىق بازاسىمەن، اسكەري ينفراقۇرىلىمنىڭ جاي- كۇيىمەن، اسكەري قىزمەتشىلەردىڭ تۇرمىس جاعدايىمەن تانىسقان.
«قورعانىس ۆەدومستۆوسىنىڭ باسشىسى ەل پرەزيدەنتى - قارۋلى كۇشتەردىڭ جوعارعى باس قولباسشىسى بەكىتكەن تاپسىرمالار شەڭبەرىندە جاۋىنگەرلىك ازىرلىكتى قاجەتتى دەڭگەيدە ۇستاپ تۇرۋ، سونداي- اق اسكەري نىساندار مەن جاقىن ماڭداعى ەلدى مەكەندەردىڭ قاۋىپسىزدىگىن قامتاماسىز ەتۋ بويىنشا ناقتى تاپسىرمالار بەردى. سونىمەن بىرگە، تازارتۋ جۇمىستارىن جالعاستىرۋ كەزىندە قاۋىپسىزدىك شارالارىن كۇشەيتۋ جانە قاتاڭ قاداعالاۋ جونىندە دە تاپسىرمالار بەرىلىپ، تۇرعىنداردىڭ قاۋىپسىزدىگى باستى نازاردا ەكەنى ايتىلدى»، - دەپ قوستى ۆەدومستۆونىڭ باسپا ءسوز قىزمەتىنەن.
