الەۋمەتتىك ءاميان ارقىلى ازىق- تۇلىكتى تومەن باعامەن ساتۋدىڭ جاڭا تەتىكتەرى ەنگىزىلەدى - الىبەك قۋانتىروۆ

نۇر- سۇلتان. قازاقپارات – ق ر الەۋمەتتىك- ەكونوميكالىق جاعدايدى تۇراقتاندىرۋ بويىنشا جەدەل ءىس- قيمىل جوسپارىن ورىنداۋ ماسەلەلەرى جونىندەگى كەڭەس بارىسىندا ۇلتتىق ەكونوميكا ءمينيسترى الىبەك قۋانتىروۆ ينفلياتسيانى باقىلاۋ جانە تومەندەتۋ جونىندەگى شارالار كەشەنى جوباسىن دايىنداۋ بارىسى تۋرالى باياندادى.

الىبەك قۋانتىروۆتىڭ ايتۋىنشا، مينيسترلىك مۇددەلى مەملەكەتتىك ورگاندارمەن بىرلەسىپ، 2022-2024 -جىلدارعا ارنالعان ينفلياتسيانى باقىلاۋ جانە تومەندەتۋ بويىنشا شارالار كەشەنى جوباسىن ازىرلەدى. ول جەدەل جانە ورتامەرزىمدىك سيپاتتاعى 66 ءىس- شارانى قامتيتىن 5 باعىتتان تۇرادى. وسى شارالاردى ىسكە اسىرۋدىڭ ماقساتى ينفلياتسيانى 2022 –جىلى % 4-6 دالىزدە، ال 2024 –جىلى % 4-5 دەڭگەيىندە ۇستاپ تۇرۋ.

«ءونىم ءوندىرۋ كولەمىن ۇلعايتۋ» شارالار كەشەنىنىڭ ءبىرىنشى باعىتى وڭتۇستىك وڭىرلەردە ەرتە پىسەتىن كوكونىس الاڭىن 1,2 مىڭ گەكتارعا كەڭەيتۋ، ازىق- تۇلىك قاۋىپسىزدىگىن قامتاماسىز ەتۋ جوسپارىن قابىلداۋ، كوكتەمگى ەگىس جانە ەگىن جيناۋ جۇمىسىنا جەڭىلدىكتى كرەديت بەرۋدى 70 ميلليارد تەڭگەدەن 140 ميلليارد تەڭگەگە دەيىن ارتتىرۋ، سونداي- اق اۋىل شارۋاشىلىعى مەن ونەركاسىپتەگى يمپورتتى الماستىراتىن ينۆەستيتسيالىق جوبالاردى ىسكە اسىرۋ جونىندەگى شارالاردى قامتيدى.

«ساقتاۋ، لوگيستيكا جانە كولىك» ەكىنشى باعىتى كارتوپ پەن كوكونىستەردى ساقتاۋ بويىنشا ينۆەستيتسيالىق جوبالاردى ىسكە اسىرۋدى، ت ش و رەسۋرستارىنان ىشكى نارىققا سۇيىتىلعان مۇناي گازىن قوسىمشا ءبولۋ ماسەلەسىن پىسىقتاۋدى، تۇراقتاندىرۋ قورلارىنىڭ جۇكتەمەسىن قامتاماسىز ەتۋدى كوزدەيدى. سونداي- اق، مۇناي ونىمدەرىن ساقتاۋ كولەمى ۇلعايتىلىپ، ءا م ا ت (الەۋمەتتىك ماڭىزى بار ازىق- تۇلىك تاۋارلارى) شيكىزاتىن، دايىن ءونىمىن جانە كوكونىس ونىمدەرىن ساتىپ الۋدىڭ قوسىمشا كولەمى قالىپتاستىرىلادى. «تاۋارلاردىڭ بولشەك ساۋداسى» باعىتى بويىنشا ءا م ا ت ساتۋشىلارى ءۇشىن جالداۋ اقىسىن تومەندەتۋ، «اينالىم سحەماسىن» قارجىلاندىرۋ كولەمىن جانە تۇراقتاندىرۋ قورىن قالىپتاستىرۋدى 140 ميلليارد تەڭگەگە دەيىن جەتكىزۋ، ءىرى وندىرۋشىلەر مەن ساۋدا جەلىلەرى اراسىندا ءا م ا ت باعالارىن تومەندەتۋ جانە قولداۋ تۋرالى كەلىسىم جاساسۋ، حالىقتىڭ الەۋمەتتىك وسال توبى ءۇشىن ماركەتپلەيستەردە ونلاين الەۋمەتتىك دۇكەندەردى ەنگىزۋ بولجانىپ وتىر.

«باعا بەلگىلەۋدى باقىلاۋ، مونوپولياعا قارسى جانە سىرتقى ساۋدانى رەتتەۋ» ءتورتىنشى باعىتى شەڭبەرىندە ءا م ا ت، ج ج م، كومىر، ەلەكتر ەنەرگياسى، دارىلىك پرەپارات باعاسىنىڭ ءوسۋىن تەجەۋ جوسپارلانۋدا. بۇل رەتتە ءا م ا ت- قا ساۋدا ۇستەمەسىنىڭ %15 ساقتالۋىن باقىلاۋدى جۇزەگە اسىرۋ جونىندەگى زاڭنامالىق فۋنكتسيانى تولىققاندى ىسكە اسىرۋ قامتاماسىز ەتىلەدى.

«جۇيەلى شارالار» ج ج م نارىعىنداعى ءونىمسىز دەلدالداردىڭ سانىن ازايتۋدى كوزدەيدى. حالىقتىڭ الەۋمەتتىك وسال توبىن قولداۋ ءۇشىن كوممۋنالدىق تولەم تولەۋ كەزىندە ولاردى جەكە توپقا ءبولۋ پراكتيكاسى ەنگىزىلىپ، تاۋارلىق گازدىڭ بولشەك ساۋدا باعاسى سارالانادى. سونداي- اق ازاماتتاردىڭ الەۋمەتتىك ءاميانىنا الەۋمەتتىك جاردەماقىلار مەن تولەمدەردى ەسەپتەۋدىڭ جانە الەۋمەتتىك ءاميان ارقىلى الەۋمەتتىك كومەك الۋشىلارعا ءامات- تى جەڭىلدىكتى/تومەندەتىلگەن باعامەن ساتۋدىڭ جاڭا تەتىكتەرى ەنگىزىلەدى.

«ينفلياتسيا مەن ونىڭ كومپونەنتتەرىن نىسانالى دەڭگەيدە ۇستاپ تۇرۋ؛ تاۋار تاپشىلىعىنا جول بەرمەۋ؛ باعانى بىرتىندەپ تۇراقتاندىرۋعا جانە بيزنەس احۋالدى جاقسارتۋعا ىقپال ەتۋ؛ نەگىزگى ازىق- تۇلىك جانە ازىق- تۇلىك ەمەس تاۋار بويىنشا ەكونوميكانىڭ وزىندىك جەتكىلىكتى بولۋىن قامتاماسىز ەتۋ ماقساتى قويىلىپ وتىر»، - دەدى مينيستر.