نۇر- سۇلتاندا كراننىڭ قۇلاۋى سالدارىنان جۇمىسشى كوز جۇمدى

نۇر- سۇلتان. قازاقپارات - ەلوردا پوليتسيا دەپارتامەنتى قالا اۋماعىندا مۇنارالى كراننىڭ قۇلاۋىنان جۇمىسشى كوز جۇمعانىن راستادى، دەپ حابارلايدى قازاقپارات ءتىلشىسى.

«اتالعان فاكتى بويىنشا ق ر قىلمىستىق كودەكسىنىڭ 277-بابى بويىنشا قىلمىستىق ءىس قوزعالدى (قۇرىلىس جۇمىستارىن جۇرگىزۋ كەزىندە قاۋىپسىزدىك قاعيدالارىن بۇزۋ، ابايسىزدا ادام ولىمىنە اكەپ سوققان ءىس- ارەكەت). وسى باعىتتا ءتيىستى ساراپتاما تاعايىندالىپ، تەرگەۋ امالدارى ءجۇرىپ جاتىر»، - دەلىنگەن دەپارتامەنت مالىمەتىندە.

اۆاريانى تەرگەپ- تەكسەرۋ ناتيجەلەرى بويىنشا مۇنارا كرانىنىڭ قۇلاۋىنىڭ سەبەپتەرى مەن ءمان- جايلارى ايقىندالاتىن بولادى، سونداي- اق ەگجەي- تەگجەيلى اقپارات ۇسىنىلاتىن بولادى. بۇعان دەيىن حابارلانعانداي، ەلوردا تۇران داڭعىلى بويىندا مۇنارالى كران قۇلادى. اكىمدىك تاپسىرماسى بويىنشا ءتيىستى كوميسسيا قۇرىلماق. ونىڭ قۇرامىندا ق ر توتەنشە جاعدايلار مينيسترلىگى سالالىق كوميتەتىنىڭ وكىلدەرى مەن باسقا دا وكىلەتتى مەملەكەتتىك ورگانداردىڭ ماماندارى ەنەتىن بولادى. كوميسسيا تەحنيكالىق تالاپتارعا ساي كەلمەيتىن مۇنارالى كرانداردى تەكسەرەدى.

«2022 -جىلعى 18- اقپاندا ساعات 17:07-دە نۇر- سۇلتان قالاسىنىڭ تۇران داڭعىلى 89/ا مەكەنجايى بويىنشا سالىنىپ جاتقان نىسان اۋماعىندا QTZ 100 مۇنارا كرانىنىڭ (2013 -جىلى شىعارىلعان) سەكسياسى سىنعان. بۇل كراننىڭ قۇلاۋىنا اكەپ سوقتى. ناتيجەسىندە، 1970 -جىلى تۋعان كرانشى العان جاراقاتتارىنان قايتىس بولدى»، - دەپ ناقتىلادى توتەنشە جاعداي مينيسترلىگىنىڭ باسپا ءسوز قىزمەتى.

اۆتور: رۋسلان عابباسوۆ