رەسەي مەن بەلارۋس: ءبىز سوعىستى قالامايمىز

نۇر- سۇلتان. قازاقپارات - رەسەي مەن بەلارۋس پرەزيدەنتتەرى ۋكراينا توڭىرەگىندەگى جاعدايدى تالقىلادى.

ۆلاديمير پۋتين مەن الەكساندر لۋكاشەنكونىڭ كرەملدە وتكەن كەزدەسۋىندە باتىستىڭ قوس ەلگە سانكسيالارمەن سەس كورسەتۋى دە ءسوز بولدى.

ەكى ەل باسشىلارى كييەۆتى مينسك كەلىسىمىن ورىنداۋعا شاقىردى. رەسەي مەن بەلارۋستىڭ وداقتاس مەملەكەت ينتەگراتسياسى سياقتى ەكى جاقتى ماسەلەلەردەن باسقا، ۆلاديمير پۋتين مەن الەكساندر لۋكاشەنكو وداقتاس باتىلدىق بىرلەسكەن وقۋ جاتتىعۋلاردىڭ ناتيجەلەرى مەن ۋكراينا توڭىرەگىندەگى شيەلەنىستى، سونىمەن بىرگە باتىس سانكسيالارىن تالقىلادى.

رەسەي پرەزيدەنتى وتكەن اۋقىمدى وقۋ- جاتتىعۋلار تەك قورعانىس سيپاتىندا بولعانىن جانە ەشكىمگە قاۋىپ توندىرمەيتىنىن اتاپ ءوتتى. ءبىراق سونىمەن قاتار ول رەسەي مەن بەلارۋس ناتو- نىڭ بەلسەندىلىگىن ەسكەرە وتىرىپ، قاۋىپسىزدىكتى قامتاماسىز ەتۋ ءۇشىن بىرلەسكەن شارالاردى جالعاستىرا بەرەتىنىن مالىمدەدى.

بىرلەسكەن وقۋ- جاتتىعۋلار 10 - اقپاندا بەلارۋس ەلىندە باستالدى. ولار 20 - اقپانعا دەيىن جالعاسادى. اسكەري جاتتىعۋلاردىڭ ماقساتى - سىرتقى اگرەسسيا مەن لاڭكەستىك شابۋىلدارعا قارسى كۇرەسۋ.

رەسەي مەن بەلارۋس پرەزيدەنتتەرى مينسك كەلىسىمىن تالقىلادى. ۋكرايناداعى ازاماتتىق بەيبىتشىلىكتى قايتا ورناتۋ مەن شيەلەنىستى باسەڭدەتۋدىڭ كىلتى وسى كەلىسىمدەردىڭ ورىندالۋىمەن تىعىز بايلانىستى دەپ ەسەپتەيدى. ولار رەسمي كييەۆتى دونباسس وكىلدەرىمەن كەلىسسوز جۇرگىزۋگە شاقىردى.

ۆلاديمير پۋتين، رەسەي پرەزيدەنتى:

- نورماند فورماتى ەلدەرى باسشىلارىنىڭ كەڭەسشىلەرى دەڭگەيىندەگى بايلانىستارىمىزعا، بارلىق كۇش- جىگەرىمىزدى سالىپ، سەرىكتەستەرمەن كەڭەسكەنىمىزگە قاراماستان بۇل شيەلەنىستى باسەڭدەتۋ ءالى دە مۇمكىن ەمەس. كييەۆ مينسك كەلىسىمدەرىن ورىندامايدى جانە، اتاپ ايتقاندا، دونەتسك جانە لۋگانسكپەن تىكەلەي ديالوگقا بارۋدان ءۇزىلدى- كەسىلدى باس تارتادى، ءىس جۇزىندە كونستيتۋتسيانى وزگەرتۋ، دونباسستىڭ ەرەكشە مارتەبەسى، جەرگىلىكتى سايلاۋلار مەن امنيستيا جاساۋ تۋرالى كەلىسىمدەردى ورىندامايدى.

الەكساندر لۋكاشەنكو ماسكەۋ مەن مينسك ءۇشىن ۋكراينامەن شەكاراداعى شيەلەنىستىڭ قاجەت ەمەستىگىن ايتتى. سونداي- اق تاراپتار ەكونوميكالىق سانكسيالارعا قارسى تۇرۋ ءۇشىن ونەركاسىپ سالاسىنداعى ىنتىماقتاستىقتى كۇشەيتۋ ارقىلى ەكونوميكالىق ەگەمەندىكتى ارتتىرۋ جولىن تالقىلادى.

الەكساندر لۋكاشەنكو، بەلارۋس رەسپۋبليكاسىنىڭ پرەزيدەنتى:

- ءبىز سوعىستى قالامايمىز. الايدا بىرەۋلەر ونى قالاسا، ءبىز اسسيمەتريالىق جاۋاپ بەرە الامىز. مۇنى الەمدە ءبارى تۇسىنەتىن شىعار. ال بۇل باعىتتا حالىقتارىمىز بەن مەملەكەتتەرىمىزدىڭ قاۋىپسىزدىگىن قورعاي وتىرىپ، ءبىز لايىقتى ارەكەت ەتەتىن بولامىز. رەسەي مەن باتىس اراسىنداعى جاڭا قىرعي- قاباق سوعىستا رەسەي مەن بەلارۋس بىرگە ارەكەت ەتەدى.

مۇنى پۋتين مەن لۋكاشەنكو كەزەكتى مارتە راستادى. ال كرەمل مينسكىدەگى ساياسي بيلىكتىڭ تۇراقتىلىعىن قولدايتىنىن ءبىلدىردى.

www.24.kz