جۇكتى ايەلدەر مەن بالالارعا تەگىن ستوماتولوگيالىق قىزمەت كورسەتىلەدى

الماتى. قازاقپارات - مەديتسينالىق ساقتاندىرۋ قورىنا تۇسەتىن جارنالاردىڭ ءىرى كولەمى الماتى قالاسى ەسەبىنەن تۇسەدى.

بۇل تۋرالى الماتى قالاسى الەۋمەتتىك مەديتسينالىق ساقتاندىرۋ قورى فيليالىنىڭ ديرەكتورى تىلەۋحان ابىلدايەۆ ايتتى، دەپ حابارلايدى قازاقپارات ءتىلشىسى.

«2021 -جىلى مەديتسينالىق ساقتاندىرۋ قورىنا رەسپۋبليكا بويىنشا 4 ميلليارد 400 ميلليون تەڭگە قارجى جينالدى. ايتۋ كەرەك، بۇل قورعا تۇسكەن جارنالاردىڭ اۋقىمدى كولەمى الماتى قالاسى ەسەبىنەن تۇسەدى. بىلتىرعى جىلى الماتى قالاسىنان 70 ميلليارد 3 ميلليون تەڭگە قارجى قورعا ءتۇستى. قورعا تۇسكەن قارجىنىڭ بارلىعى دا حالىققا كورسەتىلەتىن مەديتسينالىق قىزمەتتەرگە جۇمسالادى»، - دەدى سپيكەر.

سونداي- اق، تىلەۋحان ابىلدايەۆ م ءا م س ەسەبىنەن كورسەتىلەتىن تەگىن ستوماتولوگيالىق قىزمەتتەر جايلى ايتىپ بەردى.

«ستوماتولوگيالىق قىزمەت بويىنشا بىلتىر الماتىدا 1,5 ميلليارد تەڭگەگە كومەك كورسەتىلدى. جالپى ستوماتولوگيالىق قىزمەت جوسپارلى كومەك بولىپ تابىلادى. وعان 18 جاسقا دەيىنگى بالالار مەن جۇكتى انالارعا كورسەتىلەدى. جوسپارلى كومەكتىڭ اياسىندا ءتىستى جانسىزداندىرۋ، پلومبا سالدىرۋ، تەراپيەۆتتىڭ قابىلداۋىندا بولۋ، ءتىس جۇلدىرۋ، ەرىنگە، تىلگە پلاستيكالىق وپەراتسيالار جاساۋ سياقتى قىزمەتتەر كىرەدى. وسى جاعدايدا جۇكتى ايەلدەر مەن بالالارعا مەديتسينالىق كومەك تۇرلەرى تەگىن جوسپارلى تۇردە كورسەتىلەدى»، - دەدى الەۋمەتتىك مەديتسينالىق ساقتاندىرۋ قورى فيليالىنىڭ ديرەكتورى تىلەۋحان ابىلدايەۆ.

اۆتور: دۋمان ارعىنگەلدى