22:33, 17 - اقپان 2022 | GMT +5
توقايەۆ: «اكە تۋرالى وي-تولعاۋ» كىتابىمنىڭ جەلىسىمەن كينو ءتۇسىرۋدى ەشكىمگە تاپسىرعان جوقپىن
نۇر-سۇلتان. قازاقپارات - «Qazaqstan» تەلەارناسىنا سۇحبات بەرگەن ق ر پرەزيدەنتى قاسىم-جومارت توقايەۆ «اكە تۋرالى وي-تولعاۋ» كىتابى جەلىسىندە كينو تۇسىرۋگە تاپسىرما بەرمەگەندىگىن ايتتى، دەپ حابارلايدى قازاقپارات ءتىلشىسى.
سۇحبات بارىسىندا تەلەارنا ءتىلشىسى: «قاسىم-جومارت كەمەل ۇلى، ءسىزدىڭ «اكە تۋرالى وي-تولعاۋ» كىتابىڭىزدىڭ جەلىسى بويىنشا ءبىر پروديۋسەرلىك ورتالىق كينو تۇسىرگەلى جاتىر ەكەن. وسىعان قاتىستى نە ايتاسىز؟»، - دەپ سۇراعان ەدى.
«مەنىڭ كىتابىمداعى وقيعالاردىڭ نەگىزىندە كينو تۇسىرگەلى جاتقانىن وقىدىم. بۇل تۋرالى ەشكىمگە ەشقانداي تاپسىرما بەرگەن جوقپىن. بەرمەيمىن دە. مۇندايدى قالامايمىن. ءبىراق، ءوزىم جازعان «اكە تۋرالى وي-تولعاۋ» كىتابىنان باس تارتپايمىن، مازمۇندى تۋىندى دەپ ەسەپتەيمىن. سەبەبى، جاستارعا دا پايدالى دۇنيە. بۇل - مەنىڭ اكە-شەشە الدىنداعى پەرزەنتتىك بورىشىم»، - دەپ جاۋاپ بەردى مەملەكەت باسشىسى.
