جۇرت رەفورمالاردى زور ۇمىتپەن كۇتىپ وتىر - قاسىم-جومارت توقايەۆ

نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆ ناۋرىز ايىندا حالىققا جاڭا جولداۋ ۇسىناتىنىن ايتتى، دەپ حابارلايدى قازاقپارات ءتىلشىسى.

«قانداي تۇبەگەيلى وزگەرىستەر بولاتىنىن قازىر ايتا المايمىن. ءبىراق ءبىراز وزگەرىستەر بولادى. بۇل تۋرالى ماجىلىستە سويلەگەن سوزىمدە ايتتىم. مەن باستاپقىدا جاڭا ساياسي رەفورمالاردى كۇزدە جاريالايمىن دەپ ويلاعام، ءبىراق ساياسي رەفورمالاردى ناۋرىزدىڭ ورتاسىندا حالىققا جولداۋىمدا ۇسىناتىن بولدىم. قازىرگى تاڭدا جۇرت رەفورمالاردى زور ۇمىتپەن كۇتىپ وتىرعانىن بىلەمىن. سوندىقتان، «جاڭا قازاقستاندى بىرگە قۇرايىق» دەپ ۇندەۋ جولدادىم. وندا ايتىلعان ماسەلەلەردى كوپشىلىك قولداپ وتىر»، - دەدى قاسىم-جومارت توقايەۆ Qazaqstan ۇلتتىق تەلەارناسىنا بەرگەن سۇحباتىندا.

پرەزيدەنتتىڭ ايتۋىنشا، قوعاممەن ديالوگ بولۋ كەرەك جانە حالىقتىڭ پىكىرى ماڭىزدى.

«جالپى، كەز-كەلگەن قيىندىقتىڭ ارتىندا ۇلكەن مۇمكىندىكتەر تۇر. قىتاي تىلىندەگى «داعدارىس» دەگەن ءسوزدىڭ «جاڭا مۇمكىندىكتەر» دەگەن ماعىناسى بار. وسى رەتتە ءبىز دە كۇش- قۋاتىمىزدى وتانىمىزدى وركەندەتۋگە جۇمسايىق. ارينە، ازاماتتىق قوعاممەن، دەربەس ساراپشىلارمەن اۋقىمدى ديالوگ جۇرگىزۋ كەرەك. ويتكەنى، حالىقتىڭ پىكىرى وتە ماڭىزدى. مەن «ادامدار مەملەكەت ءۇشىن ەمەس، مەملەكەت ادامدار ءۇشىن» دەگەن ۇستانىمدى جاريالادىم. وسىعان بايلانىستى ۇكىمەتكە ءتيىستى ۇسىنىستار دايىنداۋدى تاپسىردىم»، - دەيدى ول.