قازاق جۋرناليستيكاسىنىڭ دەڭگەيى جوعارى ەكەنى كۇمانسىز - قاسىم-جومارت توقايەۆ
«جالپى قازاق جۋرناليستيكاسىنىڭ دەڭگەيى تومەن دەپ ايتۋعا بولمايدى. كەرىسىنشە قازاق جۋرناليستيكاسىنىڭ دەڭگەيى جوعارى ەكەنى كۇمانسىز. قاڭتار وقيعالارى كەزىندە اقپاراتتىق ۆاكۋۋم بولدى. ونى كاسىبي تۇرعىدا دايىندالعان لاڭكەستەر، قىلمىسكەرلەر ءوز مۇددەسىنە پايدالاندى. ينتەرنەتتى بۇعاتتاۋعا ءماجبۇر بولدىق. بۇل - الەمدىك پراكتيكا. ءبىراق، باسقا دا اقپارات قۇرالدارىمىز بار عوي. سودىرلار كەيبىر تەلە-راديو ارنالاردىڭ عيماراتىن ورتەپ، قيراتتى. ودان باسقا اقپارات قۇرالدارى ۇزدىكسىز حابار تاراتتى. ەشقانداي شەكتەۋ بولعان جوق»، - دەدى قازاقستان پرەزيدەنتى.
سونداي-اق، ول ەلدەگى ءسوز بوستاندىعىنا توقتالدى.
«ال، باسپا ءسوز بوستاندىعىنا كەلسەك، بىزدە زاڭ بويىنشا تسەنزۋرا جوق. اقپارات ەركىندىگىن بارىنشا قامتاماسىز ەتىپ جاتىرمىز. ءبىراق، ەركىندىك دەگەن ويىڭا نە كەلسە، سونى ايتۋ ەمەس. كەز-كەلگەن دەموكراتيالىق ەلدەردە جالعان اقپارات تاراتقان ادام جاۋاپقا تارتىلادى. مەن ءاربىر جۋرناليست، ەڭ الدىمەن، مەملەكەتشىل ازامات بولۋى كەرەك دەپ سانايمىن. وسى ورايدا ن. نەكراسوۆتىڭ: «اقىن بولۋ شارت ەمەس، ازامات بولۋ - مىندەتىڭ» دەگەن قاناتتى ءسوزى بار. سوندىقتان ءارقايسىمىز ەلىمىزدىڭ پاتريوتى بولۋعا ءتيىسپىز»، - دەدى مەملەكەت باسشىسى.
ونىڭ سوزىنە قاراعاندا، ءار جۋرنالسيت «ايتىلعان ءسوز - اتىلعان وق» دەگەن حالىق دانالىعىن نازاردا ۇستاۋى كەرەك.
«وسى رەتتە، وكىنىشكە قاراي، كەيبىر جۋرناليستەر جالعان اقپارات تاراتىپ، ەلدىڭ مۇددەسىنە قارسى جۇمىس ىستەيدى. قازىرگى زاماندا بلوگەرلەر كوبەيىپ كەتتى. ولاردىڭ كەيبىر ارەكەتتەرى كەرى اسەر ەتەدى.
ءبىر بلوگەرلەر جاقسى جازادى. ال ەكىنشى بىرەۋلەرى ماسەلەنىڭ بايىبىنا بارماي، زەرتتەمەي، ءۇستىرت قارايدى. دەگەنمەن، ازاماتتارىمىز اق پەن قارانى اجىراتا الادى دەپ ويلايمىن. راسىندا، اقپاراتتىق «سوعىس» بۇكىل الەمدە بولىپ جاتقان ءۇردىس. سوندىقتان، ءبىز دە وعان بەيىمدەلۋىمىز كەرەك»، - دەدى قاسىم-جومارت توقايەۆ.
