ۇلكەن يدەولوگيالىق قاتەلىك جىبەردىك - پرەزيدەنت شەتەلدە جۇمىس ىستەۋ تۋرالى
بۇل تۋرالى مەملەكەت باسشىسى قاسىم-جومارت توقايەۆ «QAZAQSTAN» تەلەارناسىنا بەرگەن سۇحباتىندا ايتتى، دەپ حابارلايدى قازاقپارات.
«الدىڭعى سۇحباتىڭىزدا ءسىز ەلىمىزدە كادر تاپشىلىعى بار ەكەنىن ايتتىڭىز. شىن مانىندە، كوپتەگەن بىلىكتى ماماندارىمىز شەتەلدە ءجۇر. ءبىلىم قۋىپ، كاسىپ ىزدەپ كەتكەندەر دە بار. شەتەلدەگى وتانداستارىمىزدى قازاقستانعا شاقىرۋ ويىڭىزدا بار ما؟ جالپى بۇل ىسكە اسۋى مۇمكىن دۇنيە مە؟»، - دەپ سۇراق قويدى جۋرناليست جاينا سلامبەك.
«راسىندا شەتەلدە جۇرگەن بىلىكتى ماماندارىمىز از ەمەس. بۇل ءۇشىن ەشكىمدى ايىپتاۋعا بولمايدى. قازىر - جاھاندانۋ زامانى. ادام قاي جەردە سۇرانىسقا يە بولسا، سول جەرگە بارىپ جۇمىس ىستەۋگە قاقى بار. وعان ەشكىم كەدەرگى جاسامايدى. ءبىز ءوز سالاسىندا تابىسقا جەتكەن ازاماتتاردى بۇعان دەيىن دە شاقىرعانبىز. ەلگە قايتىپ كەلگەن وتانداستارىمىز دا بار. ءبىراق، شىندىعىن ايتۋىمىز كەرەك، ەلىمىزگە ءبىلىمى جوعارى، پاراساتتى ادامدار كەرەك. جالپى، ادامي كاپيتال جوعارى بولۋى قاجەت. جالپاق تىلمەن ايتساق، وتانىمىزعا كەلگەن ادامداردىڭ ساپاسى نەعۇرلىم جوعارى بولسا، ەلىمىزگە سوعۇرلىم ءتيىمدى بولادى»، - دەدى قاسىم-جومارت توقايەۆ.
پرەزيدەنت جالپى، ءبارىنىڭ ەڭبەكقورلىقتىڭ، بىلىكتىلىكتىڭ يدەولوگياسىن كوتەرۋى كەرەكتىگىن اتاپ ءوتتى. ۇلتىمىز دۇنيە جۇزىندە، ەڭ الدىمەن، ەڭبەكقور، جۇمىسقا ادال ۇلت رەتىندە مويىندالاتىن بولسا، بۇل ەكونوميكامىزعا وڭ اسەر ەتەدى.
«ماسىلدىقتان، جالقاۋلىقتان الشاق بولۋىمىز قاجەت. سوندا عانا جاڭا قازاقستان تۇجىرىمداماسى ىسكە اسادى. مەنىڭشە، ءبىز بۇرىن ۇلكەن يدەولوگيالىق قاتەلىك جىبەردىك. شەتەلگە، ياعني ورتا ازيادان رەسەيگە كەتكەن جۇمىسشىلارعا كۇلىپ، «قاراڭىزدار، ولار قارا جۇمىسپەن اينالىسۋعا ءماجبۇر بولدى، ال بىزگە كەلگەندە، بىردە-ءبىر قازاق شەتەلدە جۇمىس ىستەمەيدى، جايباراقات ءجۇرمىز» دەپ قاتتى ماقتاندىق. كەز كەلگەن ەڭبەكتى جوعارى باعالاۋ قاجەت، سولاي ەمەس پە؟ بۇگىنگى كۇنى ورتا ازياداعى جۇمىسشىلار رەسەيدە ەڭبەك ەتىپ، كۇن كورىپ جاتىر. ال، بىزدىكىلەر ەڭبەك باسەكەسىنە شىداي المايتىن بولدى. وكىنىشكە قاراي، بۇل «سىريەۆوە پروكلياتە»، ياعني «شيكىزاتقا تاۋەلدى بولۋدىڭ» سالدارى»، - دەدى مەملەكەت باسشىسى.
