ق. توقايەۆ: ماعان ۆ. پۋتيننىڭ ءوزى «جەرگە قاتىستى ەشقاشان ماسەلە كوتەرمەيمىز» دەپ ايتقان

نۇر-سۇلتان. قازاقپارات - قازاقستان مەن رەسەي اراسىندا جەر ماسەلەسىنە قاتىستى داۋ ەشقاشان تۋىنداعان ەمەس.

بۇل تۋرالى مەملەكەت باسشىسى قاسىم-جومارت توقايەۆ «QAZAQSTAN» تەلەارناسىنا بەرگەن سۇحباتىندا ايتتى، دەپ حابارلايدى قازاقپارات.

«جالپى، قازاقستاننىڭ رەسەيمەن قارىم-قاتىناسى قانداي بولۋى كەرەك؟ «ماسكەۋ ءبىزدىڭ جەرىمىزگە كوز الارتىپ ءجۇر، سولتۇستىك وبلىستاردى تارتىپ الادى» دەگەن پىكىرلەر دە ايتىلادى...»، - دەدى جۋرناليست جاينا سلامبەك.

ءوز جاۋابىندا پرەزيدەنت قازاقستان مەن رەسەي اراسىندا ماڭگى تاتۋ كورشىلىك تۋرالى كەلىسىم بار ەكەنىن ايتتى.

«رەسەي - عاسىرلار بويى قاتار ءومىر ءسۇرىپ كەلە جاتقان قۇدايى كورشىمىزدىڭ ءبىرى. قازاقتىڭ تاعدىرىنا وسىلاي جازىلعان. مۇنى ءبىز وزگەرتە المايمىز. ساياسي، ساۋدا-ەكونوميكالىق جانە مادەني بايلانىستاردى نىعايتا بەرۋىمىز كەرەك. بۇل، ەڭ الدىمەن، قازاقستاننىڭ ستراتەگيالىق مۇددەسىنە ساي كەلەدى»، - دەپ اتاپ ءوتتى ق. توقايەۆ.

ەكىنشى ماسەلە بويىنشا، پرەزيدەنت راسىندا دا، كەيبىر رەسەيلىك ساياساتكەرلەر تاراپىنان «قازاقستاننىڭ سولتۇستىك وبلىستارىنداعى جەرلەر بىزدىكى» دەگەن سوزدەر ايتىلعانىن جەتكىزدى.

«بىردەن كەسىپ ايتايىن. بۇل - اقىلعا سىيمايتىن، ورىنسىز پىكىر. رەسمي بيلىك، ياعني كرەمل، ارينە، بۇل ۋاجدى قولدامايدى. ەكى ەلدىڭ باسشىلىعى اراسىندا جەر ماسەلەسىنە قاتىستى ەشقاشان داۋ تۋىنداعان ەمەس. ماعان ۆ. پۋتيننىڭ ءوزى «جەرگە قاتىستى ەشقاشان ماسەلە كوتەرمەيمىز» دەپ ايتقان. سوندىقتان الاڭدايتىن ەشنارسە جوق. شەكارامىز تولىق ايقىندالعان، بەكىتىلگەن. بۇل اقيقاتتى بۇكىل الەم مويىندايدى. ەكى ەلدىڭ اراسىنداعى بايلانىستارعا سىزات تۇسپەگەن. رەسەي پرەزيدەنتى وسىنداي قاعيداتتارعا ادالدىعىن، بەرىكتىگىن كورسەتتى»، - دەدى قاسىم-جومارت توقايەۆ.