ۇجىمدىق قاۋىپسىزدىك تۋرالى شارت ۇيىمىنىڭ كونتينگەنتى رەسەيدىڭ جەكە اسكەرى ەمەس - قاسىم-جومارت توقايەۆ
بۇل تۋرالى «QAZAQSTAN» ۇلتتىق تەلەارناسىنداعى سۇحباتى كەزىندە مەملەكەت باسشىسى قاسىم-جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى.
«ءسىز ۆلاديمير پۋتينگە قوڭىراۋ شالىپ، ۇجىمدىق قاۋىپسىزدىك تۋرالى شارت ۇيىمىنىڭ اسكەرىن قازاقستانعا شاقىردىڭىز. بۇل ەلىمىزدىڭ دەربەستىگىن، ەگەمەندىگىن رەسەيگە تەلۋ دەگەن ءسوز ەمەس پە؟ سولاردى شاقىرماسا بولمايتىن با ەدى ءوزى؟ قازىر وسى شەشىمىڭىزگە وكىنبەيسىز بە؟»، - دەپ سۇرادى ءتىلشى.
ءوز كەزەگىندە مەملەكەت باسشىسى بۇل شەشىمگە وكىنبەيتىنىن اتاپ ءوتتى.
«وكىنبەيمىن. بۇل ەشقانداي دا وكىندىرەتىن شەشىم ەمەس. كەرىسىنشە دۇرىس شەشىم بولدى دەپ ويلايمىن. ويتكەنى، قارۋلى قاراقشىلار الماتىنى قيراتىپ، وزگە قالالارعا قاۋىپ ءتوندىردى. وسى قارۋلى كونتينگەنت بولماسا، لاڭكەستەر باسقا دا قالالاردى باسىپ الار ەدى. قارۋلى شايقاستار تالدىقورعاندا، تارازدا، شىمكەنتتە، قىزىلوردادا ورىن الدى. ەلوردادا لاڭكەستەردىڭ دايىندىق جۇمىستارى بايقالدى، ولار، ءتىپتى، اقورداعا شابۋىل جاساۋعا دايىن بولدى. كەيبىر بەدەلدى ساراپشىلار ايتۋىنشا، لاڭكەستەر قازاقستاننىڭ باستى ەكى قالاسىن باسىپ الۋدى جوسپارلاعان. بۇل سيرياداعى سەناريگە ۇقساس جوسپار. سول ەلدە لاڭكەستەر داماسك پەن راككانى باسىپ الۋعا ارەكەتتەنگەن ەدى»، - دەدى قاسىم-جومارت توقايەۆ.
پرەزيدەنت ۇجىمدىق قاۋىپسىزدىك شارت ۇيىمىنىڭ اسكەرلەرى ءبىزدىڭ ەلدە ءبىر دە ءبىر وق اتپاعانىن اتاپ ءوتتى.
«ونى اشىق ايتۋ كەرەك. ولار تەك نەگىزگى ستراتەگيالىق نىسانداردى كۇزەتىپ تۇردى. وسى كەزدە ءبىزدىڭ كۇشتىك قۇرىلىمدار ىسكە كىرىسىپ، قارۋلى لاڭكەستەرگە توسقاۋىل قويدى. ارامىزدا تەك تىعىز بايلانىس پەن ۇيلەسىم بولدى. ال ەندى «پۋتينگە قارىز بوپ قالدىق» دەگەنگە كەلسەك، بۇل - بوس اڭگىمە. ونى دوعارۋ كەرەك. بىرىنشىدەن، ۇجىمدىق قاۋىپسىزدىك تۋرالى شارت ۇيىمىنىڭ كونتينگەنتى ۆ. پۋتيننىڭ نەمەسە رەسەيدىڭ جەكە اسكەرى ەمەس. بۇل ۇيىمنىڭ اسكەري قۇرامى وعان مۇشە ەلدەردىڭ بارىنە ورتاق. وندا رەسەيدەن بولەك، بەلارۋس، ارمەنيا، تاجىكستان جانە قىرعىزستاننىڭ اسكەري بولىمدەرى بار. قازاقستان دا - وسى ۇيىمنىڭ تولىققاندى مۇشەسى ءارى نەگىزىن قالاۋشىسى. سوندىقتان، ءبارى - زاڭدى، قيسىندى»، - دەدى مەملەكەت باسشىسى.
«رەسەيگە كەلسەك، بۇل الپاۋىت ەل ءوزىنىڭ گەوساياسي مۇددەسىن دە قورعادى. قازاقستاننىڭ تۇراقتىلىعى رەسەيگە وتە قاجەت. مۇنى دۇرىس ءتۇسىنۋىمىز كەرەك. قازاقستان مەن رەسەي - ستراتەگيالىق سەرىكتەستەر. ارامىزدا شىنايى دوستىق پەن ءوزارا سەنىم بولۋى كەرەك. باسقا ساياسات ۇستانساق، ەكى ەلدىڭ ستراتەگيالىق مۇددەسىنە نۇقسان كەلتىرەمىز. جالپى، ءبىز ەشكىمگە ەشتەڭە دە قارىز ەمەسپىز. قازاقستان - ەگەمەن مەملەكەت. سوندىقتان ساياساتىمىز دا دەربەس»، - دەدى پرەزيدەنت.
