21:11, 17 - اقپان 2022 | GMT +5
رەسەي جانە ۇ ق ش ۇ- عا مۇشە مەملەكەتتەر قازاقستاننىڭ عانا ەمەس، وزدەرىنىڭ دە قاۋىپسىزدىگىن ويلادى - پرەزيدەنت
نۇر-سۇلتان. قازاقپارات - رەسەي - قازاقستانعا جاقىن ورنالاسقان سەرىكتەس مەملەكەت. بۇل تۋرالى «Qazaqstan» تەلەارناسىنا سۇحبات بەرگەن ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
سۇحبات بارىسىندا تەلەارنا ءتىلشىسى كورشى ەلدىڭ كەيبىر جۋرناليستەرى «رەسەي قازاقستاندى قۇتقاردى» دەپ جازىپ جۇرگەنىن اتاپ ءوتتى.
«جاڭا عانا ايتىپ ءوتتىم، رەسەي - قازاقستانعا جاقىن ورنالاسقان سەرىكتەس مەملەكەت. وسىنداي جاعدايدا ونىڭ بىزگە كومەككە كەلۋى ايتپاسا دا تۇسىنىكتى. مۇنى قۇتقارۋ ەمەس، ورتاق مۇددەمىزدى قورعاۋ ءۇشىن جاسالعان ءىس-ارەكەت دەپ تۇسىنۋگە بولادى. بۇل - ءبىر. ەكىنشىدەن، اتالعان ماسەلەگە گەوساياسي احۋال تۇرعىسىنان دا قاراۋ كەرەك. ۇجىمدىق قاۋىپسىزدىك تۋرالى شارت ۇيىمى - بارىمىزگە ورتاق قۇرىلىم. رەسەي جانە ۇيىمعا مۇشە مەملەكەتتەر قازاقستاننىڭ عانا ەمەس، وزدەرىنىڭ دە قاۋىپسىزدىگىن ويلادى. سول ءۇشىن كومەك قولىن سوزدى»، - دەدى وسى رەتتە قاسىم-جومارت توقايەۆ.
