باۋىرجان مومىش ۇلىنىڭ كەلىنىنە ايتقان ناسيحاتى

نۇر- سۇلتان. قازاقپارات - زەينەپ احمەتوۆانىڭ «بابالار اماناتى» كىتابىندا «اتانىڭ ماعان ايتقان اقىل سوزدەرى» اتتى تاراۋ بار. بۇل تاراۋدا اۆتور باۋىرجان مومىش ۇلىنىڭ ناسيحات سوزدەرىن جاريالاعان. ءبىز بۇگىن باۋىرجان مومىش ۇلىنىڭ كەلىنىنە ايتقان اقىل سوزدەرىنەن ءۇزىندى ۇسىنىپ وتىرمىز.

اناعان دا، مىناعان دا تاڭعالاسىڭ دا جۇرەسىڭ. سوعان كەتكەن قۋاتىڭدى، ۋاقىتىڭدى وزگەنى تاڭعالدىرۋعا جۇمسامايسىڭ با؟ ! مەنىڭشە، سەندە وعان جەتەتىن كۇش- قۋات بار. الاتىن كەزدە - العا وزىپ، بەرەتىن كەزدە ارتتا بۇعىپ قالاتىن، العانى مەن بەرگەنىن جىپكە ءتىزىپ سانايتىن ادامنان اۋلاق ءجۇر. ونداي ادامنان قۇتىلۋدىڭ ءوزى - ۇلكەن ولجا. ادام ەشكىمگە سەنبەي، بارىنە كۇدىكتەنىپ، اينالاسىنداعىلاردى ىلعي «الدامشى»، «قۋ»، «ناشار ادامدار» دەپ ويلاپ جۇرسە، تۋرا سونداي سۇمىرايلار كەزدەسە بەرەدى، قاسىڭا توپتالىپ، جينالا بەرەدى.

وزگەدەن ارتىق بولامىن دەپ ارىنداما، شاماڭدى ساقتا. تەڭ تۇسكەنگە قاناعات ەت. «قاناعات قارىن تويعىزار، قاناعاتسىزدىق جالعىز اتىن سويعىزار» دەگەن اتا- باباڭ. ءبىراق تەپكىگە توزبە، ەشقاشان اياققا باسىلماعىن. ادام ومىرگە، مىناۋ جارىق دۇنيەگە جىلاپ كەلەدى. اتا- انا، تۋعان- تۋىس اينالاسى شات- شادىمان قۋانادى. كەتەرىڭدە وزگەلەر جىلاپ، ءوزىڭ ريزاشىلىقپەن قۋانىپ كەتەتىندەي ىستە. عىلىم- ءبىلىم دەگەن - ءتۇپسىز تۇڭعيىق. جۇمىر جەردىڭ بەتىندە ونىڭ تۇبىنە جەتكەن جان جوق. دەگەنمەن شەتسىز- شەكسىز ءىلىم- ءبىلىم جولىندا اركىم ءوزىنىڭ ورەسى، شاما- شارقى جەتكەن جەرگە ءبىر بەلگى - شىبىق شانشىپ قالدىرسا، سول شىبىق ءوسىپ، وزىنەن كەيىنگىگە سايا بولىپ، جول نۇسقاپ جاتسا، ەستە قالعان دەگەن سول بولادى. ماڭداي تەرىڭ تامعان ەڭبەگىڭ مەن اقىلىڭ جۇپتاسا قول ۇستاسىپ جۇرمەسە، تاپقانىڭ تابانىڭنىڭ استىندا تارىداي شاشىلادى.

Massaget.kz