دەپۋتات ەكسترەميزم مەن تەرروريزمگە قارسى جاڭا باعدارلاما ازىرلەۋدى ۇسىندى

نۇر- سۇلتان. قازاقپارات - ق ر پارلامەنتى سەناتىنىڭ دەپۋتاتى سۇلتان دۇيسەمبينوۆ ەكسترەميزم مەن تەرروريزمگە قارسى جاڭا باعدارلاما ازىرلەۋدى ۇسىندى، دەپ حابارلايدى قازاقپارات ءتىلشىسى.

«ستاتيستيكالىق مالىمەتتەر بويىنشا، ءدىني قىزىعۋشىلىق بىلدىرگەن ازاماتتاردىڭ 73 پايىزى قاجەتتى مالىمەتتەردى عالامتور جەلىسىنەن ىزدەيدى. ياعني، قازىرگى عالامتوردا الەۋمەتتىك جەلىلەر، ۆيدەوحوستينگتەر مەن بلوكپلاتفورمالار جانە باسقا دا بايلانىستىرۋشى اقپارات قۇرالدارى الەمدەگى جاڭا مۇمكىندىكتەرمەن قاتار جاڭا قاۋىپتەردىڭ تۋىنداۋىنا سەپتىگىن تيگىزۋدە»، - دەگەن دەپۋتات ديسترۋكتيۆتى ءدىني اعىمداردىڭ تۇپكى ماقساتى ەلدىڭ كونستيتۋتسيالىق قۇرىلىمىن وزگەرتۋ ەكەنىن اتاپ ءوتتى.

«2019 -جىلى قازاقستان ءدىنتانۋشىلارىنىڭ 11 فورۋمىندا ۇلتتىق قاۋىپسىزدىك كوميتەتىنىڭ تەرروريزمگە قارسى ورتالىعىنىڭ وكىلى سەرگەي شۆەيكين ءوز سوزىندە قازاقستاندىق دەسترۋكتيۆتى اعىمداردى ۇستانۋشىلاردىڭ سانى 20 مىڭنان اساتىنىن مالىمدەدى. وسى تۇستا بۇلاردىڭ سانى نەگە كوبەيىپ جاتىر دەگەن سۇراق تۋىندايدى. كەيبىر دەرەكتەر بويىنشا، ەلىمىزدە ءدىني ەكسترەميزم مەن تەرروريزمگە قارسى ءىس- قيمىل جونىندەگى 2018-2022 -جىلدارعا ارنالعان مەملەكەتتىك باعدارلامانى ىسكە اسىرۋ ءۇشىن بيۋدجەتتەن بەس جىلعا 270 ميلليارد تەڭگە بولىنگەن. الايدا ونىڭ %4- ى عانا پروفيلاكتيكالىق ءىس- شارالارعا جۇمسالدى. بۇل باعدارلامانىڭ ءوز ناتيجەسىن ءتيىستى دارەجەدە بەرمەگەنىن قايعىلى قاڭتار وقيعاسى كورسەتىپ وتىر. ءالى كۇنگە دەيىن وسى سالاعا جاۋاپتى ۋاكىلەتتى ورگاندار بۇل ماسەلەگە باعا بەرگەن جوق»، - دەدى سۇلتان دۇيسەمبينوۆ.

ساۋال سوڭىندا دەپۋتات ەلدەگى ءدىني احۋالدى زەردەلەپ، ءدىني ەكسترەميزم مەن تەرروريزمگە قارسى ءىس- قيمىل جونىندەگى جاڭا مەملەكەتتىك باعدارلاما ازىرلەۋ كەرەكتىگىن ايتتى. سونداي- اق، ول وڭىرلەر بولىنىسىندە ءدىني احۋالدىڭ كارتاسىن ازىرلەپ، ءدىن سالاسى بويىنشا مونيتورينگ جانە ساراپتامامەن اينالىساتىن رەسپۋبليكالىق زەرتتەۋ ورتالىعىن قۇرۋدى ۇسىندى.

اۆتور: ەسىمجان ناقتىباي