ەلدى قيراتۋ، توناۋدان ەشكىم ۇتپايدى - ماڭعىستاۋلىق قوعام بەلسەندىسى

نۇر-سۇلتان. قازاقپارات - قاڭتاردىڭ باسىندا ەلدە بولعان جاپپاي تارتىپسىزدىكتەر مەن ماڭعىستاۋ وبلىسىنداعى بەيبىت ميتينگكە قاتىستى اتالعان ءوڭىر تۇرعىنى، قوعام بەلسەندىسى سامسون اراكەليان ءوز ويىن ورتاعا سالدى، دەپ حابارلايدى قازاقپارات ءتىلشىسى.

«ماڭعىستاۋدا مۇناي-گاز سالاسىندا جۇمىس ىستەگەن ادام رەتىندە بايقاعانىم، قازىر جۇمىسشىلار ءوز ويى مەن پروبلەماسىن اشىق ايتۋ مۇمكىندىگى بار. دەگەنمەن كوتەرىلگەن ماسەلەنىڭ از ۋاقىتتىڭ ىشىندە شەشىلمەيتىنىن ەسكەرگەن ءجون. مۇنايشىلار كوتەرىپ وتىرعان ماسەلە ءبىر كۇننىڭ ىشىندە شەشىلە قويمايدى. ەڭ باستىسى بيلىك پەن جۇمىسشىلار اراسىندا دۇرىس ديالوگتىڭ بولۋى»، - دەدى ماڭعىستاۋ وبلىستىق باسكەتبول فەدەراتسياسىنىڭ ديرەكتورى، «Doma Doma» قوعامدىق قورىنىڭ جەتەكشىسى سامسون اراكەليان.

ونىڭ ايتۋىنشا، ەلىمىزدىڭ باتىس وڭىرىندە ميتينگ بەيبىت تۇردە ءوتتى.

«قاڭتار وقيعاسى كورسەتكەندەي، زورلىق-زومبىلىق ارقىلى وزگەرىس ەلدىڭ دامۋىن كەيىنگە شەگەرەدى. سوندىقتان ماسەلەنىڭ بەيبىت جولمەن شەشىلگەنى ابزال جانە الداعى ۋاقىتتا حالىقتىڭ تالابى كەلىسىم ارقىلى شەشىمىن تابادى دەپ سەنەمىن. ارينە، تۇرعىندار ماسەلەسىن كوتەرىپ، بيلىكتىڭ نازارىن اۋدارتقىسى كەلەدى. ءبىراق شارا بەيبىت فورماتتا وتسە جانە بيلىك پروبلەماعا نازار اۋدارسا... ەلدى قيراتۋ، توناۋدان ەشكىم ۇتپايدى. ءبارىمىزدىڭ دە وتباسىمىز، جاقىن جاندارىمىز بار»، - دەيدى ول.