ازاماتتىق ۇيىمدارمەن بىرلەسە ۇستالعانداردىڭ جاعدايى كۇندەلىكتى تەكسەرىلىپ جاتىر - ەلدوس قيلىمجانوۆ

نۇر-سۇلتان. قازاقپارات - بۇعان دەيىن قولدانىلعان بۇلتارتپاۋ شارالارىن جەڭىلدەتۋ بويىنشا جۇمىستار جۇرگىزىلىپ جاتىر.

بۇل تۋرالى ورتالىق كوممۋنيكاتسيالار قىزمەتىندە ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ايتتى، دەپ حابارلايدى قازاقپارات ءتىلشىسى.

«پروكۋراتۋرا ورگاندارى ازاماتتىق ۇيىمداردىڭ وكىلدەرىمەن بىرلەسە قاماۋعا الىنعانداردىڭ جانە ۇستالعانداردىڭ جاعدايىن كۇندەلىكتى تەكسەرۋدە. سونىمەن قاتار، بۇعان دەيىن قولدانىلعان بۇلتارتپاۋ شارالارىن جەڭىلدەتۋ بويىنشا جۇمىستار جۇرگىزىلۋدە. جەكە باستارىن، دەنساۋلىق جاعدايىن جانە وزگە دە سيپاتتاعى ماتەريالداردى ەسكەرىپ، 157 ادامعا قولدانىلعان قاماۋعا الۋ ەشقايدا كەتپەۋ تۋرالى قولحاتقا، كەپىل، ءۇيقاماق جانە جەكە كەپىلگەرلىككە اۋىستىرىلدى. كورسەتىلگەن ساندار تۇپكىلىكتى ەمەس، بۇلتارتپاۋ شارالارىن قايتا قاراۋ جۇمىستارى جالعاسۋدا»، - دەدى ە. قيلىمجانوۆ.

مۇنىمەن قوسا ول پروكۋرورلار جاپپاي تارتىپسىزدىكتەرگە ولاردىڭ قاتىستىلىعى بولماۋىنا بايلانىستى ۋاقىتشا ۇستاۋ اباقتىلارىنان 103 ادامدى بوساتىلعانىن جەتكىزدى.

بۇدان بۇرىن حابارلانعانداي، بيىلدىڭ 16- اقپانىنداعى جاعداي بويىنشا باس پروكۋراتۋرانىڭ، ىشكى ىستەر مينيسترلىگىنىڭ، ۇلتتىق قاۋىپسىزدىك كوميتەتىنىڭ جانە سىبايلاس جەمقورلىققا قارسى ءىس-قيمىل قىزمەتىنىڭ تەرگەلۋىندەگى بارلىق قىلمىستىق ىستەر بويىنشا 741 كۇدىكتى سوت سانكتسياسىمەن قاماۋدا.

سونىمەن قاتار، ەلدوس قيلىمجانوۆ ۇرلانعان قارۋدىڭ قاي بولىگى تابىلعانىن ايتتى.