21:37, 16 - اقپان 2022 | GMT +5
ۇكىمەت كومىر جەتكىزۋ تىزبەگىندەگى ءونىمسىز دەلدالداردى جويۋ جۇمىستارىن باستادى
نۇر-سۇلتان. قازاقپارات - قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى رومان سكلياردىڭ توراعالىعىمەن كوممۋنالدىق كومىرگە باعا بەلگىلەۋ ماسەلەسى قارالدى، دەپ حابارلايدى primeminister.kz.
كومىردى تاۋار بيرجاسى ارقىلى وتكىزۋ بويىنشا پيلوتتىق جوبانىڭ ناتيجەسى تالقىلاندى.
بۇل مەحانيزم ءوزىنىڭ تيىمدىلىگىن كورسەتتى - دەلدالداردىڭ سانى قىسقاردى، بولشەك ساتۋشىلاردىڭ كومىر كەنىشتەرىنىڭ رەسۋرستارىنا تىكەلەي قول جەتكىزۋى قامتاماسىز ەتىلدى.
كومىر قۇنىنا وڭتايلى باعا بەلگىلەۋدى قامتاماسىز ەتۋ ماقساتىندا ۇكىمەت ءونىمسىز دەلدالداردى شەتتەتۋ جۇمىستارىن باستادى.
يندۋستريا جانە ينفراقۇرىلىمدىق دامۋ، ساۋدا جانە ينتەگراتسيا مينيسترلىكتەرى مەن باسەكەلەستىكتى قورعاۋ جانە دامىتۋ اگەنتتىگى حالىقتى كومىرمەن قامتاماسىز ەتۋ تىزبەگىندەگى قاجەتسىز بايلانىستاردى جويۋ جانە تاۋار بيرجاسى ارقىلى ساتىلاتىن كومىر كولەمىن كەزەڭ-كەزەڭىمەن ۇلعايتۋ شارالارىن ازىرلەۋدە.
بۇل جۇمىس ۇكىمەتتىڭ ەرەكشە باقىلاۋىندا.
