قورعانىس مينيسترلىگى اسكەري مەديتسينانى كۇشەيتۋ شارالارىن قابىلداۋدا

نۇر-سۇلتان. قازاقپارات - قورعانىس ۆەدومستۆوسىندا اسكەري-مەديتسينالىق بولىمشەلەردى زاماناۋي مەديتسينالىق تەحنيكامەن جاراقتاندىرۋ، كادرلىق قامتاماسىز ەتۋ جانە ينفراقۇرىلىمدى جەتىلدىرۋ ماسەلەلەرى پىسىقتالىپ جاتىر، دەپ حابارلايدى قازاقپارات ق ر قورعانىس مينيسترلىگىنىڭ رەسمي سايتىنا سىلتەمە جاساپ.

- اسكەري مەديتسينا قىزمەتى جاۋىنگەرلىك قابىلەتتى قالپىنا كەلتىرۋ ماقساتىندا جەكە قۇرامدى اسكەري-مەديتسينالىق قامتاماسىز ەتۋگە باعىتتالعان. ودان بولەك، قارۋلى كۇشتەردىڭ اسكەري مەديتسيناسى ەلدەگى كوروناۆيرۋس ينفەكسياسىمەن كۇرەسكە بەلسەنە اتسالىسىپ، بىتىمگەرشىلىك ميسسياعا دايىندىققا دا تارتىلعان، - دەپ اتاپ ءوتتى پارلامەنت ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ وتىرىسىندا سويلەگەن سوزىندە قورعانىس ءمينيسترىنىڭ ورىنباسارى گەنەرال-مايور مۇحامەدجان تالاسوۆ.

سونىمەن قاتار، قازىرگى كەزدە ءبىرقاتار كەمشىلىكتەر دە بار. اتاپ ايتقاندا، تەك نۇر-سۇلتانداعى، الماتى جانە تالدىقورعانداعى ءۇش گوسپيتال جانە 15 مەدپۋنكت ەمدەۋ مەكەمەلەرىنە ارنالعان ارنايى عيماراتتاردا ورنالاسقان.

قورعانىس مينيسترلىگى اقتاۋ قالاسىنداعى اسكەري-تەڭىز گوسپيتالى مەن نۇر-سۇلتان قالاسىنداعى گوسپيتال-ەمحانا كەشەنىن سالۋ، سونداي-اق مودۋلدىك قۇرىلىمداعى مەديتسينالىق پۋنكتتەر ءۇشىن عيماراتتار ساتىپ الۋ جانە سالۋ ماسەلەسىن پىسىقتاۋدا.

قارۋلى كۇشتەردىڭ اسكەري مەديتسينا قۇرامىنا 20 اسكەري-مەديتسينالىق مەكەمە مەن 130 دان استام مەديتسينالىق بولىمشەلەر كىرەدى. جىل سايىن ساناتورلىق-كۋرورتتىق ەمدەلۋگە 1000 نان استام اسكەري قىزمەتشى مەن اسكەري زەينەتكەرلەر جىبەرىلەدى. قورعانىس ۆەدومستۆوسى «اسكەري قىزمەت پەن اسكەري قىزمەتشىلەردىڭ مارتەبەسى تۋرالى» ق ر زاڭىنا اسكەري قىزمەتشىلەردىڭ الەۋمەتتىك قورعالۋىن جاقسارتۋعا باعىتتالعان مەديتسينالىق كورسەتكىشتەر بويىنشا ساناتورلىق-كۋرورتتىق ەمدەۋگە قاتىستى تۇزەتۋلەردى ۇسىندى.

وزگە دە ۇسىنىستار ۆەدومستۆولىق تيەسىلىگىنە قاراماستان، كۇشتىك ۆەدومستۆولاردىڭ اسكەري-مەديتسينالىق بولىمشەلەرىندە مەديتسينالىق قىزمەتتەر الۋدى، سونداي-اق اسكەري قىزمەت ورنىندا اسكەري-مەديتسينالىق مەكەمەلەردىڭ بولۋىنا قاراماستان، ازاماتتىق دەنساۋلىق ساقتاۋ ۇيىمدارىندا اسكەري قىزمەتشىلەرگە مەديتسينالىق كومەك كورسەتۋدى كوزدەيدى.

قورعانىس مينيسترلىگى كادرلاردى دايارلاۋ جانە دارىگەرلەردىڭ بىلىكتىلىگىن ارتتىرۋ ماقساتىندا مەديتسينالىق ماماندىقتاردى وقىتۋ ءۇشىن اۋە قورعانىسى كۇشتەرىنىڭ اسكەري ينستيتۋتىنا كۋرسانتتاردى قابىلداۋدى قايتا باستادى.

قازىرگى ۋاقىتتا جوعارى وقۋ ورىندارىندا ءبىرىنشى كۋرستىڭ 12 كۋرسانتى، التىنشى كۋرستىڭ 23 ينتەرنى جانە جەتىنشى كۋرستىڭ 15 ينتەرنى ءبىلىم الادى. زاڭناماعا جىل سايىن 25 كۋرسانت قابىلداۋ، رەزيدەنتۋرا باعدارلاماسى بويىنشا اسكەري دارىگەرلەردى دايارلاۋ جونىندە وزگەرىستەر ەنگىزۋ دە جوسپارلانىپ وتىر.