ماسساج اعزاعا قالاي اسەر ەتەدى؟

نۇر-سۇلتان. قازاقپارات - ماسساج - اعزانى ساۋىقتىراتىن ەجەلگى تاجىريبەلەردىڭ ءبىرى. پروبلەمالىق جەرگە ماسساج ارقىلى اسەر ەتۋ بۇلشىقەتتەردىڭ اۋىرعانىن كەتىرىپ قانا قويمايدى، سونداي-اق باسقا دا ماسەلەلەردى شەشۋگە كومەكتەسەدى.

دۇرىس ماسساجدىڭ اسەرلەرى ءارتۇرلى، سوندىقتان قالاعان ناتيجەگە جەتۋ ءۇشىن دۇرىس تەحنيكا تاڭداۋ ماڭىزدى. ماسساجدىڭ كومەگىمەن قانداي اسەرلەر الۋعا بولاتىنىن قاراستىرايىق.

ماسساج اعزاعا قورەكتىك اسەر بەرەدى. ماسساج سەانسى كەزىندە ليمفا، ۇلپاارالىق سۇيىقتىق جانە قان اعىنى جاقسارادى، ال تىندەر كوبىرەك وتتەك، ميكروەلەمەنتتەر مەن دارۋمەندەر الادى. ناتيجەسىندە بۇلشىقەتتەر قالپىنا كەلىپ، ولاردىڭ جۇمىسقا قابىلەتتىلىگى جاقسارادى. ماسساج كەزىندە زات الماسۋ كۇشەيەدى جانە اسەر ەتكەن جەردە تەرىنىڭ تىنىس الۋى جاقسارادى.

ماسساج ادامعا سەرگىتۋشى اسەر بەرە الادى. پروتسەدۋرا كەزىندە، سىڭىرلەردىڭ، بۇلشىقەتتەردىڭ جانە بايلامداردىڭ رەتسەپتورلارىنان ميعا جۇيكە يمپۋلستارىنىڭ اعىمى ارتادى. بۇل ميدىڭ تورلى فورماتسياسىنىڭ بەلسەندىرىلۋىنە اكەلەدى، ياعني، ادامعا سەرگىتۋشى اسەر بەرەدى. سەرگىتۋشى اسەردى ارتتىرۋ ءۇشىن ماسساجدى از ۋاقىت جانە جىلدام قارقىندا جاسايدى. اعزانى سەرگىتۋ ءۇشىن مىنا ماسساجدىق ادىستەر قولدانىلادى: تەرەڭ يلەۋ، ۇرعىلاۋ، قاققىلاۋ.

شامادان تىس جۇيكە-بۇلشىقەت جانە پسيحولوگيالىق كەرنەۋدى ازايتۋ ءۇشىن ماسساجدىڭ تىنىشتاندىراتىن اسەرى قولدانىلادى. تىنىشتاندىراتىن اسەر بۇكىل دەنەنى ىرعاقتى جانە ۇزاق سيپالاۋ ارقىلى بەرىلەدى. تىنىشتاندىراتىن اسەر ەندورفيندەردىڭ (اۋىرسىنۋدى تابيعي باساتىن زاتتار) بولىنۋىمەن جانە ورتالىق جۇيكە جۇيەسىندە تەجەلۋ پروتسەسىنىڭ دامۋىمەن تۇسىندىرىلەدى. ماسساجدى باياۋ قارقىندا ۇزاق جاساسا، ونىڭ تىنىشتاندىراتىن اسەرى ارتا تۇسەدى.

قالىپقا ءتۇسىرۋشى اسەر ميداعى جۇيكە يمپۋلستارىنىڭ رەتتەلۋىنە بايلانىستى جۇزەگە اسادى. ماسساج ميدىڭ قوزۋ جانە تەجەلۋ پروتسەستەرىن قالىپقا كەلتىرەدى. ماسساج سەانسى كەزىندە ۋقالاناتىن بۇلشىقەتتەر ايماعىندا وڭ قوزۋ وشاعى قالىپتاسادى.

ول ميداعى بۇرىننان بار قوزۋدىڭ پاتولوگيالىق وشاعىن تەجەي الادى. ماسساجدىڭ قالىپقا ءتۇسىرۋشى اسەرىن ءتۇرلى زاقىمدار كەزىندە زاقىمدالعان جەردى قالىپقا كەلتىرۋ ءۇشىن جانە بۇلشىقەتتەر سەمۋىنىڭ دامۋىن بولدىرماس ءۇشىن قولدانادى. اعزا فۋنكسيالارىن قالىپقا كەلتىرۋ ءۇشىن جەكە رەفلەكسوگەندىك ايماقتاردىڭ سەگمەنتتىك ماسساجى قولدانىلادى.

ماسساج جۇيكە-بۇلشىقەت اپپاراتىن دۇرىستاۋعا، بۇلشىقەت-سىڭىرلەر كەرنەۋىن ازايتۋعا جانە جالپى اعزا جاعدايىن جاقسارتۋعا مۇمكىندىك بەرەدى.

massaget.kz