نۇرلان نوعايەۆ ماڭعىستاۋداعى جۇمىسسىزدىققا قاتىستى: قىزمەتىن اسىرا پايدالاناتىندار بار

نۇر- سۇلتان. قازاقپارات - ماڭعىستاۋ وبلىسىنىڭ اكىمى نۇرلان نوعايەۆ وڭىردەگى حالىقتى ەڭبەكپەن قامتۋ ماسەلەسىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.

«ءيا، وڭىردە جۇمىسسىزدىق ماسەلەسىنىڭ بارى راس. ءبىراق، ماسەلە مەملەكەتتىك باعدارلامالاردىڭ اياسىندا شەشىمىن تاۋىپ جاتىر. سول سياقتى بارلىق ماڭعىستاۋلىقتاردى نەمەسە جاڭاوزەندىكتەردى مۇناي- گاز سالاسىنا جۇمىسقا كىرگىزۋ مۇمكىن ەمەس. كەزىندە وبلىس اكىمدىگى، «قازمۇنايگاز» ا ق جانە جەرگىلىكتى مۇناي- گاز وڭدەۋ كومپانيالارىمەن بىرلەسىپ بوس جۇمىس ورنىنا قابىلداۋدىڭ الگوريتمى ازىرلەنىپ، قابىلداندى. ۋاقىت وتە كەلە ول الگوريتم ءوزىنىڭ تيىمدىلىگىن كورسەتتى. ءبىز سول باعىتتاعى جۇمىستى جالعاستىراتىن بولامىز»، - دەدى نۇرلان نوعايەۆ ونلاين وتكەن باسپا ءسوز ءماسليحاتىندا.

سونداي- اق، وبلىس باسشىسى وڭىردە جۇمىسقا ورنالاسۋ بويىنشا پروبلەمانىڭ بارىن ايتتى.

«كەيدە بوس جۇمىسقا ورنالاسۋ اشىق تۇردە وتپەي جاتادى. نەمەسە جاۋاپتى تۇلعالاردىڭ قىزمەتىن اسىرا سىلتەپ پايدالانىپ جاتاتىن ساتتەر دە بار. سوندىقتان ءبىز جوعارىدا اتالعان جۇمىسقا تۇرۋ الگوريتمىن قايتا قاراپ، ماسەلەنى نازاردا ۇستايمىز. سولايشا جۇمىسقا ورنالاسۋدا اشىقتىقتى قامتاماسىز ەتپەكپىز»، - دەيدى ول.

ماڭعىستاۋ اكىمىنىڭ ايتۋىنشا، الدىمەن ەڭبەكپەن قامتۋ ورتالىعىندا رەسمي تىركەلگەن ازاماتتار جۇمىسپەن قامتىلادى. بۇعان دەيىن ءوڭىر باسشىسى ماڭعىستاۋدا جىل سايىن 1 مىڭ ادامنىڭ جۇمىسپەن قامتىلاتىنىن ايتقان ەدى.

اۆتور: ءالي يبرايەۆ