ماجىلىستە تۇرعىن ءۇي ساياساتىنا قاتىستى ۇسىنىس جاسالدى
وسى ورايدا ول ۇكىمەت باسشىسى ءاليحان سمايلوۆتىڭ اتىنا دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.
«ەلىمىزدە ءار ازاماتتىڭ الەۋمەتتىك جاعدايى باسپاناسىنىڭ بولۋىمەن بايلانىستى ەكەنى بەلگىلى. رەسپۋبليكامىز بويىنشا سوڭعى جىلدارى بۇل ماسەلە ەداۋىر كۇردەلەنىپ كەلەدى. جىلدار بويى كەزەكتە تۇرعان الەۋمەتتىك وسال توپتار ساناتىنىڭ وكىلدەرى ءۇي الۋ مۇمكىندىگىنە سەنىمسىزدىك بىلدىرۋدە. مىسالى، 2018 -جىلدان بەرى كەزەكتە تۇرعان ادامداردىڭ ءتىزىمى شامامەن 130 مىڭعا كوبەيىپ، 591 مىڭ تىركەلۋشىنى قۇراپ وتىر. ونىڭ ىشىندە، ولاردىڭ سانى شىمكەنتتە 14 مىڭعا ءوسىپ، 48442 ادام بولسا، الماتى وبلىسىنداعى ءۇي كەزەگىن كۇتۋشىلەردىڭ سانى 17 مىڭعا ءوسىپ، 59067-گە جەتتى. ال تۇركىستان وبلىسىندا كەزەكتەگى سان 19 مىڭعا ارتتى. بۇل سيفرلار تەك وسۋمەن بولسا، پاتەر جالداعان وتباسىلار كوشۋمەن الەك»، - دەدى ە. بەيسەنبايەۆ ءماجىلىستىڭ جالپى وتىرىسىندا.
ونىڭ ايتۋىنشا، 591 مىڭنان استام كەزەكتە تۇرعان ادامنىڭ 170 مىڭعا جۋىعىنىڭ جان باسىنا شاققانداعى تابىسى كۇنكورىس دەڭگەيىنەن تومەن، ياعني كەدەيشىلىكتىڭ شىڭىراۋ شەگىندە ەكەنىنىڭ دالەلى. ايتا كەتەتىنى، بۇل ساناتتاعى كوپشىلىكتى - 1، Ⅱ توپتاعى مۇگەدەكتەر، ەرەكشە بالالاردى اسىراۋشى وتباسىلار، جەتىمدەر، كوپبالالى وتباسىلار قۇرايدى.
«مەملەكەت باسشىسى 2020 -جىلدىڭ باسىنا دەيىن «باقىتتى وتباسى» باعدارلاماسىنىڭ اۋقىمىن كەڭەيتۋدى تاپسىرعان بولاتىن. ال ۇكىمەت بولسا، تەك قارجىنى ۇلعايتۋمەن شەكتەلدى. وسى ورايدا، الەۋمەتتىك وسال توپتارعا كىرەتىن جەتىمدەر مەن مۇگەدەكتەر ساناتى قايتا سىرتتا قالىپ قويدى. سونىمەن قاتار، «شاڭىراق» باعدارلاماسىنا ارنالعان قارجى ءالى ورتاق وپەراتورعا ۇيلەستىرىلمەگەن. ۇكىمەت ءۇشىن ءبىر اي ۋاقىت ەمەس شىعار، ال پاتەر جالداۋشى ءۇيسىز وتانداسىمىزعا بۇل كەزەكتى دالاعا كەتكەن پاتەراقىسىنىڭ سوماسى»، - دەدى دەپۋتات.
وسى ورايدا ول ۇكىمەت تاراپىنان دايارلانىپ جاتقان «تۇرعىن ءۇي ساياساتى» تۋرالى زاڭنامانىڭ جوباسىنا ءتيىستى ۇسىنىستاردى ەسكەرە كەلە، ناقتى شەشىمدەر تىزبەگىن قاراستىرۋدى سۇرادى.
اۆتور: رۋسلان عابباسوۆ
