باسپا ءىسى جانە كىتاپ ساۋداسى تۋرالى زاڭ قابىلداۋ كەرەك - اقبەرەن ەلگەزەك
«ەشكىمگە قۇپيا ەمەس، قازىر ەلىمىزدىڭ بارلىق دۇكەندەرىندە قازاق تىلىندە جازىلعان كىتاپتار جەتىم بۇرىشتا تۇر. بۇل تۋرالى تالاي ايتىلدى، تالاي جازىلدى، ءبىراق ناقتى شەشىمىن تاپپادى. ونىڭ سەبەبى بىرەۋ-اق - ماسەلە زاڭ اياسىندا كورسەتىلىپ، شەشىلمەگەن. مىسالى ءوزىمنىڭ «بولماعان بالالىق شاق» اتتى كىتابىمدى «مەلومان» دۇكەنى قابىلداعان جوق. جوعارى جاققا حابارلاسىپ، اراعا ادام سالىپ، ۋاقىتتى سوزىپ ءجۇرىپ، ارەڭ وتكىزدىك. ولاردىڭ ايتاتىن ءۋاجى - قازاق تىلىندە كىتاپ وقىلمايدى، ونى ەشكىم ساتىپ المايدى دەيدى. ونىڭ ءبارى وتىرىك. قازىرگى جاستار كىتاپتى جاقسى وقيدى. كەيىن دە «مەلومان» وسى كىتابىمدى ەكى رەت قايتالاپ سۇرادى، ياعني ءبارى ساتىلىپ كەتكەن»، - دەدى ا. ەلگەزەك ەلوردادا ق ر مادەنيەت جانە سپورت مينيسترلىگىنىڭ القا وتىرىسىندا.
ونىڭ ايتۋىنشا، مادەنيەت مينيسترلىگى باسپا ءىسى جانە كىتاپ ساۋداسى تۋرالى زاڭدى قابىلداۋعا باستاما كوتەرۋگە ءتيىس. ول زاڭ بىرىنشىدەن، قازىر كىتاپ شىعارۋ ىسىندە مونوپوليسكە اينالعان كوپتەگەن ءىرى باسپالاردىڭ ىقپالىن ازايتار ەدى. باسپالار اۆتورلارمەن جۇمىس ىستەپ، شىنايى نارىق قالىپتاستىرار ەدى. بۇل ادەبيەتتىڭ دامۋىنا زور سەرپىن بەرەدى.
«قازىر «قوعامدىق ماڭىزى بار» دەگەن اتاۋمەن جىلدا كىتاپ شىعىپ جاتىر، ولار ەشكىم قارامايتىن كىتاپحانالارعا جىبەرىلەدى، ناقتى وقىرماننىڭ قولىنا جەتپەيدى. قوعامدىق ماڭىزى بار ادەبيەت دەگەن باعدارلاما كىتاپتارى مەكتەپ كىتاپحانالارىندا بار ما؟ ونىڭ ەكى سالا ەكەنى تۇسىنىكتى، ءبىراق مەملەكەت بىزدە بىرەۋ. سوندىقتان، ءبىلىم مينيسترلىگىمەن بىرلەسە وتىرىپ، بۇل ماسەلەنى شەشۋگە بولادى دەپ ويلايمىن. قازىر مەكتەپ كىتاپحانالارىندا قازاق تىلىندەگى كىتاپتار سانى 27 پايىز. دەمەك، قالعان 73 پايىزى ورىس تىلىندە دەگەن ءسوز. وتىز جىل بويى شىعىپ كەلگەن كوركەم ادەبيەت ول مەكتەپتەرگە جەتپەگەن، مەكتەپ سورەلەرىندە سول سوتسياليستىك- رەاليزم تالابىمەن شىققان ەسكى يدەولوگيانى ناسيحاتتايتىن ادەبي كىتاپتار تۇر. بۇل تۋرالى ارنايى رەسپۋبليكالىق كىتاپحاناشىلار سەمينارىندا ايتىلدى، سوندىقتان بۇل ساندار ويدان شىعارىلماعان»، - دەپ اتاپ ءوتتى ا. ەلگەزەك.
سپيكەر باسپا ءىسى جونىندەگى زاڭ قابىلدانىپ، ناقتى ەرەجەلەر جازىلسا، شارۋا ءبىرشاما شەشىلەتىنىن ايتتى.
«مىسالى كىتاپ دۇكەندەرىندە كەزىندە ب ا ق-قا قاتىستى جاساعانداي 50/50 ەرەجەسىن جاساۋعا بولادى - ياعني، كىتاپ دۇكەندەرىنە 50 پايىزىن قازاقشا كىتاپ ەتۋدى مىندەتتەۋ كەرەك. باسپا ءىسى جونىندەگى زاڭ جوباسىن ينتەرنەتتەن قاراپ شىقتىم، ونى ەرمۇحامەد ەرتىسبايەۆ جاساعان بولاتىن. سونى زاماناۋي تۇزەتۋ ەنگىزىپ، قابىلداۋ كەرەك دەپ ەسەپتەيمىن. ۇشىنشىدەن، قازاق ادەبيەتىن قولداۋ تۋرالى ءۇش جىلعا ارنالعان مەملەكەتتىك باعدارلامانى قابىلدايتىن ۋاقىت كەلدى. سەبەبى ادەبيەت - بارشاڭىز بىلەتىندەي رۋحاني قازىنامىز. ول باعدارلامادا كوركەم اۋدارما ءىسى جانە باسقا دا كوپتەگەن ماسەلەلەر قامتىلۋى كەرەك. تارقاتىپ ايتا بەرسەك، ماسەلە كوپ. ءبىراق نيەت بولسا، باعدارلاما جاساپ شىعۋعا ءازىرمىز»، - دەپ قورىتىندىلادى ا. ەلگەزەك.
اۆتور: ايجان سەرىكجان قىزى
