رەسمي ماسكەۋ ە ق ى ۇ- نىڭ ۋكراينا بويىنشا وتىرىسىنا قاتىسۋدان باس تارتتى

نۇر-سۇلتان.قازاقپارات - رەسمي ماسكەۋ ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ۋكراينا بويىنشا وتىرىسىنا قاتىسۋدان باس تارتتى.

مۇنى رەسەي تاراپى اسكەري ءىس- شارالار جۇرگىزبەيتىندىگىمەن ءتۇسىندىردى. ال گەرمانيا بولسا، رەسەي اسكەري كۇشتەرىنىڭ ۋكراينامەن شەكارالاس ايماقتان شىققانىن شيەلەنىستى ازايتۋدىڭ ءبىرىنشى كەزەڭى دەپ سانايدى. كرەملدە وتكەن كەلىسسوزدە رەسەي پرەزيدەنتى ۆلاديمير پۋتين مەن گەرمانيا كانسلەرى ولاف شولتس ۋكراينا توڭىرەگىندەگى جاعدايدى ديپلوماتيالىق جولمەن شەشۋگە دايىن ەكەندىكتەرىن مالىمدەدى.

رەسەي پرەزيدەنتى ۆلاديمير پۋتين مەن گەرمانيا كانسلەرى ولاف شولتس اراسىنداعى كەلىسسوزدەر ۇزاققا سوزىلدى. تالقىلاناتىن وتكىر تاقىرىپتار از ەمەس. ەڭ الدىمەن، بۇل ۋكراينا توڭىرەگىندەگى شيەلەنىستى ازايتۋ. سونىمەن بىرگە ەكى جاق «سولتۇستىك اعىن 2» گاز قۇبىرىنىڭ بولاشاعىن دا قاراستىردى. ەۋروپانىڭ ەڭ ءىرى ينفراقۇرىلىمدىق جوبالارىنىڭ ءبىرى «سولتۇستىك اعىن 2» گاز قۇبىرى وتكەن جىلدىڭ جەلتوقسان ايىنان باستاپ تەحنيكالىق تۇرعىدان پايدالانۋعا دايىن. قازىر گەرمانيا ونى سەرتيفيكاتتاۋدان وتكىزىپ جاتىر. ءبىراق رەسەي ۋكرايناعا باسىپ كىرسە، ماسكەۋگە سالىناتىن سانكتسيا كەسىرىنەن بۇل جوبانىڭ بولاشاعى ەكىتالاي بولۋى مۇمكىن.

ۆلاديمير پۋتين رەسەي، گەرمانيانىڭ مۇناي مەن گازعا دەگەن قاجەتتىلىگىنىڭ ۇشتەن ءبىرىن قامتاماسىز ەتەتىنىن ەسكە سالدى.

ۆلاديمير پۋتين، رەسەي پرەزيدەنتى:

- مەن بۇل جوبانىڭ تازا كوممەرتسيالىق جوبا ەكەنىن جانە مۇندا ەشقانداي ساياسات، ساياسي استار جوق ەكەنىن بىرنەشە رەت ايتقانمىن. سونداي- اق، ەگەر ەۋروپا تاراپىنان سۇرانىس بولسا جانە ساۋدا ءتيىمدى بولسا، ءبىز 2024 -جىلدان كەيىن دە، ياعني ۋكراينا ارقىلى ترانزيت بويىنشا كەلىسىمشارتتىڭ مەرزىمى اياقتالعاننان كەيىن دە، وسى ەل ارقىلى گاز جەتكىزۋدى جالعاستىرۋعا دايىن ەكەنىمىزدى اتاپ وتكىم كەلەدى.

ۋكراينانىڭ اۋماقتىق تۇتاستىعىنا كەلەتىن بولساق، ونىڭ تالقىلاۋعا جاتپايتىندىعىن گەرمانيا ۇكىمەتىنىڭ باسشىسى باسا ايتتى. ولاف شولتس رەسەي اسكەرلەرىنىڭ ءبىر بولىگىنىڭ ۋكراينامەن شەكارالاس ايماقتان شىعارىلۋىن جاقسى نىشان دەپ اتادى. بۇعان دەيىن رەسەي قورعانىس مينيسترلىگى اسكەري تەحنيكا شەكاراداعى وقۋ- جاتتىعۋلاردان تۇراقتى ورنالاسۋ ورىندارىنا قايتارىلدى دەپ مالىمدەدى.

ولاف شولتس، گەرمانيانىڭ فەدەرالدىق كانسلەرى:

- قازىر ءبىز باتىلدىقپەن، جاۋاپكەرشىلىكپەن ارەكەت ەتۋىمىز كەرەك. ءبىزدىڭ زامانداستارىمىز ءۇشىن ەۋروپادا سوعىستى ەلەستەتۋ مۇمكىن ەمەس. اسكەري شيەلەنىسكە جول بەرمەۋ - مەملەكەت پەن ۇكىمەت باسشىلارىنىڭ مىندەتى. ياعني، ءبىزدىڭ مىندەتىمىز. رەسەي باسشىسى باتىس، ماسكەۋدىڭ قاۋىپسىزدىك كەپىلدىگى تۋرالى باستى تالاپتارىن ەلەمەگەنىمەن، كرەمل كەيبىر جەكە ماسەلەلەردى ديپلوماتيالىق جولمەن شەشۋگە دايىن ەكەندىگىن مالىمدەدى.

www.24.kz