ۋكراينادا سوعىس ءورتى تۇتانۋى مۇمكىن بە؟

نۇر-سۇلتان.قازاقپارات - ۋكراينا توڭىرەگىندەگى احۋال كۇن وتكەن سايىن ۋشىعىپ بارادى. سوعىس وتى كەز كەلگەن ساتتە تۇتانىپ كەتەتىندەي.

رەسەي شەكارا ماڭىنا اسكەردى ءۇيىپ- توكسە، ناتو ۋكراينا اۋماعىنا توننالاپ قارۋ- جاراق تاسىمالداپ جاتىر، دەپ حابارلايدى «حابار 24».

باتىستىڭ ب ا ق وكىلدەرى دە قاراپ وتىرعان جوق. 16-اقپان كۇنى رەسەي ۋكرايناعا باسىپ كىرەتىنىن حابارلادى. سونىمەن ۋكراينا ەلىندەگى احۋال قازىر قانداي؟ شابۋىل بولا ما؟

جالپى قازىر رەسەي ۋكراينانى جان- جاقتان قورشاۋعا العان. شەكارا ماڭىنا مىڭداعان ساربازىن شوعىرلاندىردى. قارۋلى كۇشتەر بەلارۋستەن بولەك، قىرىمدا دا، قارا تەڭىزدە دە جاتتىعۋ وتكىزىپ جاتىر. ال مىنا ۆيدەودان ۋكراينالىق ساربازداردىڭ دايىندىعىن كورۋگە بولادى. ولار تۇركيانىڭ بايراكتارى مەن تانكتەردى تالقاندايتىن دجاۆەلين قوندىرعىلارىن ءىس جۇزىندە سىناپ جاتىر. ءبىر سوزبەن ايتقاندا، قازىر ەكى ەلدىڭ اسكەرى بەتپە- بەت كەلدى. مۇندايدا كورشىلەر بەيبىتشىلىككە قالاي جەتپەك، شيەلەنىستى قالاي شەشپەك دەگەن سۇراق تۋارى انىق. سەبەبى كيەۆ پەن باتىس ەلدەرى رەسەيدىڭ ۋكراينانى باسىپ الۋ ارەكەتىنەن قاۋىپتەنەدى. الايدا كرەمل بۇل ايىپتاۋلاردى بىرنەشە رەت جوققا شىعارعان.

دميتري پەسكوۆ، رەسەي پرەزيدەنتىنىڭ باسپا ءسوز حاتشىسى:

- رەسەي اسكەرى تەك ەل ىشىندە عانا قوزعالىپ جاتىر. قارۋلى كۇشتەر مەن ءتۇرلى جاساقتاردىڭ جىلجۋى ۋكراينا اۋماعىنداعى شەكارادا دا بايقالادى. ولار ءتىپتى ءوزىن- ءوزى جاريالاعان رەسپۋبليكالاردىڭ اۋماعىمەن شەكتەسەتىن ايماقتارعا شوعىرلاندىرىلعان. بۇل دا جاعدايدى ودان سايىن ۋشىقتىرا تۇسەدى.

ۋكراينا بەيبىت ءومىردى عانا قالايدى جانە بارلىق ماسەلەنى كەلىسىم ارقىلى شەشەدى. ۋكراينا حالقىنا ۇندەۋ جاساعان ەل پرەزيدەنتى كەشە وسىلاي دەدى. وزگەنىڭ مەنشىگىنە قول سۇقپايتىنىن، وزىنىكىن بەرمەيتىنىن دە كەسىپ ايتتى. زەلەنسكيدىڭ سوزىنشە، قىرىم مەن دونباسس ۋكراينانىڭ ايماعىنا قايتا قوسىلادى. ءبىراق بۇل ماسەلە تەك ديپلوماتيالىق جولمەن شەشىمىن تابۋى ءتيىس.

ۆلاديمير زەلەنسكي، ۋكراينا پرەزيدەنتى:

- ەلدى تاستاپ كەتكەن جانە الداعى ۋاقىتتا شەتەلگە كەتۋدى كوزدەپ جۇرگەن بارلىق جوعارى لاۋازىمدى قىزمەتكەرلەر مەن دەپۋتاتتارعا ايتارىم بار. ۋكراينا حالقى مەملەكەتتى باسقارۋ مەن قورعاۋدى سىزدەرگە تاپسىردى. قازىرگىدەي قيىن- قىستاۋ كەزەڭدە حالىقپەن بىرگە بولۋ سىزدەردىڭ تىكەلەي مىندەتتەرىڭىز. سوندىقتان سىزدەردى ءبىر تاۋلىك ىشىندە ەلگە ورالىپ، حالىقپەن بىرگە بولۋعا شاقىرامىن.

قازىر تورتكۇل دۇنيە ۋكراينا مەن رەسەي شەكاراسىنداعى شيەلەنىستى احۋالعا قاتتى الاڭداۋلى. بۇل سۋىق سوعىستان كەيىنگى ەڭ ءىرى قاقتىعىس، دەيدى كەي ساراپشىلار. ال رەسەي بيلىگىنىڭ دونەتسك پەن لۋگانسك حالىق رەسپۋبليكالارىن مويىنداۋى جاعدايدى ودان بەتەر قيىنداتا ءتۇسۋى مۇمكىن. بۇل ماسەلە بۇگىن مەملەكەتتىك دۋمادا قارالادى. بۇعان قارسى جاۋاپ رەتىندە قازىر ۋكراينا پارلامەنتى دونەتسك پەن لۋگانسكتىڭ ۋكرايناعا تيەسىلى ەكەنىن راستايتىن جوبا ازىرلەپ جاتىر.

سانات كوشكىمبايەۆ، ساياساتتانۋشى:

- ءبىر ساتتە ءبارى باقىلاۋدان شىعىپ كەتۋى مۇمكىن دەگەن قاۋىپ بار. ماسەلەن، كەزدەيسوق اتىلعان وق نەمەسە قانداي دا ءبىر قاقتىعىس. ءتىپتى ەشكىم كۇتپەگەن سەناري دە بولۋى مۇمكىن. قالاي بولعاندا دا، باتىستىڭ ب ا ق وكىلدەرى رەسەيدىڭ ۋكرايناعا باسىپ كىرەر كۇنىن جارىسا جازىپ جاتىر. مەديا باسىلىمداردىڭ مالىمەتى بويىنشا شابۋىل ەرتەڭگە جوسپارلانعان كورىنەدى. الايدا كرەمل مۇنىڭ ءبارىن جوققا شىعارىپ كەلەدى. سوعان قاراماستان، ا ق ش كيەۆتەگى ەلشىلىگىن لۆوۆقا ۋاقىتشا كوشىرەتىن بولدى. كانادا دا ەلشىلىگىن كيەۆتەن وسى قالاعا اۋىستىرۋ تۋرالى شەشىم قابىلدادى.

www.24.kz