نۇرلان نوعايەۆ ماڭعىستاۋلىقتارعا تاعى دا ۇندەۋ جاسادى
«قۇرمەتتى ماڭعىستاۋلىقتار! سوڭعى كۇندەرى جاڭاوزەن قالاسىنداعى بىرنەشە كاسىپورىن جۇمىسىن توقتاتتى. جۇمىسشىلاردىڭ ءبىر بولىگى جۇمىس بەرۋشىلەرگە جالاقىنى كوتەرۋ ماسەلەسىن قويىپ وتىر. قازىرگى ۋاقىتتا جاڭاوزەن قالاسىندا «قازمۇنايگاز» كومپانياسىنىڭ باسشىسى اليك ايداربايەۆ جۇمىس ىستەپ جاتىر. ول ەڭبەك ۇجىمدارىمەن كەزدەسىپ، قالىپتاسقان جاعدايدى جانە ولاردى شەشۋ جونىندەگى قولعا الىنىپ جاتقان شارالاردى تۇسىندىرۋدە. سونداي- اق، جاڭاوزەن قالاسىندا جۇمىسسىز ازاماتتاردى جۇمىسقا ورنالاستىرۋ بويىنشا وسىمەن ەكىنشى اپتا قاتارىنان وبلىس اكىمىنىڭ ءبىرىنشى ورىنباسارى ابزال مەڭدىبايەۆ باستاعان ارنايى كوميسسيا جۇمىس جۇرگىزىپ جاتىر. بۇل سۇراقتاردا العا ىلگەرىلەۋشىلىك بار»، - دەپ اتاپ وتەدى ءوڭىر اكىمى.
وبلىس باسشىسى وڭىرلەگى پروبلەمالاردى شەشۋ ءۇشىن جۇيەلى جۇمىستار جۇرگىزىلىپ جاتقانىن دا اتاپ وتەدى.
«مەن بارلىعىن جاقسى تۇسىنەمىن. پروبلەمالار بار. ولاردى شەشۋ ءۇشىن ءبىز بارلىق مۇددەلى تاراپتارمەن جۇيەلى تۇردە جۇمىس ىستەۋىمىز كەرەك. قانشا قالاساق تا ءوڭىردىڭ بارلىق تۇرعىندارىن ءبىر مەزەتتە مۇناي- گاز سالاسىنا جۇمىسقا ورنالاستىرۋ مۇمكىن ەمەس. ءبىراق ءبىز شاعىن جانە ورتا بيزنەس كاسىپورىندارىندا، باسقا دا مەملەكەتتىك جانە باسقا كاسىپورىندارىندا جاڭا جۇمىس ورىندارىن قۇرىپ، ءوڭىر ەكونوميكاسىن ءارتاراپتاندىرۋعا ءتيىسپىز. حالىقتىڭ جانە ەلدىڭ اماندىعى ءۇشىن بارشاڭىزدى سابىر ساقتاۋعا جانە تۇسىنىستىك تانىتۋعا شاقىرامىن. كوتەرىلگەن ماسەلەلەر شەشىلەدى. ءبىراق بىردەن ەمەس. ول ءۇشىن ۋاقىت قاجەت»، - دەدى ول.
نۇرلان نوعايەۆتىڭ اتاپ وتۋىنشە، قىسقا مەرزىمدە «وزەن مۇنايگاز» اكسيونەرلىك قوعامى جاڭاوزەن قالاسىنىڭ 150 جۇمىسسىز ازاماتىن جۇمىسقا ورنالاستىرۋى كەرەك. تاعى 150 تۇرعىندى سەرۆيستىك مەكەمەلەرگە جۇمىسقا قابىلداۋدى جوسپارلاپ وتىر.
«مەن مەكەمە جۇمىسشىلارىن جانە كاسىپوداق ۇيىمدارىن جۇمىس بەرۋشىمەن كونسترۋكتيۆتى ديالوگ قۇرۋعا شاقىرامىن. ەلىمىزدىڭ پرەزيدەنتى قاسىم- جومارت كەمەل ۇلى توقايەۆ بىرنەشە رەت اتاپ وتكەندەي، بىزگە قوردالانعان ماسەلەلەردى ۇستەل باسىندا شەشۋ كەرەك. ماڭعىستاۋ وبلىسىنىڭ اكىمدىگى «قازمۇنايگاز» ۇلتتىق كومپانياسىنىڭ باسشىلىعىمەن، باسقا دا مەملەكەتتىك ورگاندارمەن بىرلەسىپ، جاعدايدى ەرەكشە باقىلاۋدا ۇستاپ وتىر. سونداي- اق، جاڭاوزەن قالاسىنداعى شاعىن جانە ورتا بيزنەس سۋبەكتىلەرى قوسىمشا تاعى 50 جاڭا جۇمىس ورنىن اشادى. وسىلايشا، ارنايى ازىرلەنگەن الگوريتم نەگىزىندە جاڭاوزەن قالاسىنىڭ جۇمىسسىز ازاماتتارى كەزەك- كەزەگىمەن جۇمىسقا ورنالاستىرىلاتىن بولادى. بۇل - ۋاقىتتىڭ ەنشىسىندەگى ماسەلە. ءبىز جۇمىسقا ورنالاستىرۋدىڭ وسى الگوريتمىنىڭ اشىقتىعى مەن ادالدىعىنا كەپىلدىك بەرەمىز. جاڭاوزەن قالاسىنىڭ تۇرعىندارى دا كوميسسيا قۇرامىندا بار»، - دەدى نۇرلان نوعايەۆ.
سونىمەن قاتار ول ماڭعىستاۋلىقتاردى ارانداتۋشىلىققا بوي الدىرماۋعا شاقىردى.
«ءوڭىر باسشىسى رەتىندە، ءارى وسى وبلىستىڭ جاناشىر تۇرعىنى رەتىندە، ارانداتۋشىلىققا بوي الدىرماۋدى جانە پوپۋليستىك ۇراندار مەن بوس ۋادەلەرگە الدانىپ قالماۋلارىڭىزدى سۇرايمىن. ءبىز بارلىق قيىندىقتى بىرگە جەڭەمىز! سىزدەردى اقىلمەن شەشىم قابىلداپ، ادىلدىك تانىتادى دەپ سەنەمىن!»، - دەدى وبلىس اكىمى.
اۆتور: مارلان جيەمباي
